(کابل ټکی کام، ۱۳۹۸، تله ۱۶، سه شنبه)
د غزني ولايت په شلګر ولسوالۍ کې طالبانو د ګډو ځواکونو پر نظامي قطار برید کړی چې د ځايي سرچينو په وینا بهرنيو او داخلي عسکرو ته پکې مرګ ژوبله اوښتې ده.
د غزني ولايت امنیتي سرچینې وايي، دغه بريدونه د یادې ولسوالۍ مربوط په خدوخيلو او کمالخيلو سیمو کې د امريکايي او داخلي ځواکونو په ګډ قطار ترسره شوي دي.
د سرچينې په وینا، په بریدونو کې د ګډو ځواکونو څلور ټانګونه ویجاړ شوي او نږدې شل عسکرو ته مرګ ژوبله اوښتې ده.
طالب ویاند ذبیح الله مجاهد په یاده سیمه کې پر ګډو ځواکونو د بریدونو پخلی کړی او په خپله رسمي ټويټرپاڼه لیکي، چې د ګډو ځواکونو په نظامي قطار يې چاودنې او بریدونه کړي چې په وينا يې په ترڅ کې يې لس امریکايي او اته داخلي عسکر وژل شوي، پنځه امریکايي او اووه داخلي عسکر ټپيان شوي دي.
نوموړي په سیمه کې د ګډو ځواکونو د سوځيدلو ټانګونو انځورونه او ويډیو هم خپره کړې ده.
تر اوسه په افغانستان کې ميشت بهرنیو ځواکونو او امنیتي مسؤولینو د ګډو ځواکونو د تلفاتو په اړه معلومات نه دي رسنيز کړي.
ډير کله بهرنيانو ته په چاودنو او د طالبانو بریدونو کې تلفات اوړي چې هغوی يې د خپلې پاليسۍ له مخې له رسنیو پټ ساتي.
