(کابل ټکی کام، ۱۳۹۸، تله ۳۰، سه شنبه)
د امریکا دفاع وزير مارک اسپر وړمه ورځ د اکتوبر په ۲۰ نيټه په یوه نا اعلان کړي سفر کابل ته راغلو او دلته يې په یوه خبري غونډه کې وويل، چې تر هغې به د طالبانو او نورو وسله والو پرضد مبارزه او بريدونه دوام لري تر څو چې سوله نه وي راغلي.
دغه راز د کورنيو چارو وزارت هم ادعا کړې چې د طالبانو الفتح عملیات يې له ناکامۍ سره مخ کړي او هغوی يې ګواښلي دي.
طالبانو د امریکا د دفاع وزير او کابل حکومت چارواکو ورته څرګندونو ته په غبرګون کې ويلي، چې تر څو یو امریکايي عسکر هم په افغانستان کې شتون ولري دوی به خپله مبارزه او جهاد جاري وساتي.
طالبان وايي، په تيرو اتلس کلونو کې ثابته شوه چې هيڅ قوت يې نه ماتولی او نه يې له خپلې ارادې راګرځولی شي زياتوي “دا خاوره په افغانانو پورې اړه لري، افغانان د خپلې خاورې د ازادولو او دلته د اسلامي نظام د حاکمیت حق لري، او په دې لاره کې پراته ټول خنډونه به یا په زور یا هم که مقابل جهت غوښتي وي د منطق له لارې له منځه وړي”.
طالبانو د کابل حکومت ته ورياده کړې چې د امریکايانو په بمباريو ناز ونه کړي او له خپلو غورځو پرځو لاس په سر شي په خبره يې “ لکه څرنګه چې د انګریزانو او شوروي اتحاد مزدورانو دلته ماتې وخوړه، د ملت او تاریخ په وړاندې سرټيټې شول، همداسې به امریکايي غلامان هم ذلیل کیږي”.
دغه راز طالبانو ويلي، چې الفتح عمليات يې بريالي دي ځکه په وینا يې امريکايانو یوازې په تيره مياشت کې ۹۴۸ بمونه غورځولي، سلګونه چاپې او عمليات يې کړي چې سلګونه ملکيانو ته پکې مرګ ژوبله اوښتې خو د طالبانو د پرمختګ مخه يې نه ده نيولې.
طالبانو ادعا کړې چې د (الفتح عملياتو) له پيله تر دې دمه يې ۲۸ ولسوالۍ، له سلو زيات بيسونه، سلګونه پوستې يې نيولي، زياتې سيمې يې تر خپل کنترول لاندې راوستي او دغه راز د ۴۱۹ قوماندانانو په شمول زرګونه دولتي عسکرو ته يې مرګ ژوبله اړولې ده. چې په داسې حال کې طالبانو ته اخطارونه ورکول ليونتوب دی.
