کابل ټکى کام (چهارشنبه ، ١ لړم ،١٣٩٨ل)
د افغانستان بهرنیو چارو وزارت سرپرست صلاح الدین رباني له دندې استعفا وکړه. نوموړي د استعفا ليک متن په خپله فسبوک خپور کړی دی.
د يادونې وړ ده، چې د ملي یوالي حکومت له مشر اشرف غني سره د ښاغلي رباني اړیکې له ډېرې مودې راهیسې ترینګلې وې. او دوه اوونۍ وړاندې د ولسمشر له لوري د بهرنیو چارو وزارت ویاند صبغت الله احمدي ګوښه کولو سره د هغوی تر منځ اړیکې نورې هم تاوجنې شوې
صلاح الدین رباني په خپل استعفا لیک کې ادعا کړې چې په ملي یووالي حکومت کې کاري فضا مطلوبه نه ده، نوموړي ولسمشر محمد اشرف غني متهم کړی، چې په تېرو پنځو کلونو کې د موازي جوړښتونو رامنځته کېدو او د هغو بنسټونو د څنګ ته کېدو شاهد و چې په خبره یې په ټوله نړۍ کې د نظامونو بنسټونه بلل کيږي.
ښاغلي رباني په خپل استعفا لیک کې نیوکه کړې چې د ملي وحدت حکومت په موده کې د اصلاحاتو په نامه توپيري اقدامات ترسره شول، چې د ملي وحدت بسنټونه یې سخت زیانمن کړل.
نوموړی وایي،اوس چې د حکومت کاري موده هم مخ په خلاصېدو ده مناسبه نه بولي چې دندې ته دوام ورکړي.
