کابل ټکى کام (جمعه ، ٣ لړم ، ١٣٩٨ل)
د امریکا د دفاع وزیر مارک اسپر په کردي جنګیالیو باندې د ترکیې پر بریدونو نیوکه کړې، او ویلي یې دي چې دترکي ځواکونو وروستي بریدونه دمنلو وړ نه دی.
په همدې حال کې د سوریې شمال ختیځ ته روسیې پوځي پولیس او تجهیزات لیږلي دي چې ممکن حالات نور هم کړکېچن شي.
دا پرېکړه یوه ورځ وروسته له هغې شوې چې د امریکا ولسمشر ډونالډ ټرمپ ویلي، د سوریې په شمال ختیځ کې تل پاتې اوربند نافذ شوی او د ترکیې لخوا پر کردانو د بریدونو درولو په غبرګون کې یې پر ترکیې اقتصادي بندیزونه په مشروط ډول پای ته ورسول.
د روسیې دفاع وزارت وايي شمال خیځ ته یې ۲۷۶ پوځي پولیس او تهجیزات لیږلي دي.
دغه شمیر سرتیري د ترکیې او سوریې ترمنځ پر پوله میشت شوي او ترکیې اعلان کړی چې نور په سوریه کې پوځي عملیاتو ته اړتیا نشته.
بلې خوا بیا دامريكا د دفاع وزارت وايي، د تېل لرونكو سيمو د امنيت د ټينګښت او د داعش ډلې د مخنيوي لپاره د سوريې په شمال لوېديځ كې خپل پوځي حضور پراخوي.
د پنټاګون دا تصميم څو ورځې وروسته له هغه نيول شوى، چې د امريكا ولسمشر ډونالډ ټرمپ د تركيې د پولې په اوږدو كې له پرتو سيمو څخه د خپلو سرتېرو د ايستلو اعلان وكړ، ترڅو تركي ځواكونو ته د امريكا له متحدو كردي جنګيالو نه د يوې خوندي خالي سيمې د رامنځته كولو اجازه وركړل شي.
