کابل ټکى کام (جمعه ، ٣ لړم ، ١٣٩٨ل)
د مرکزي او جنوبي آسیا لپاره د امریکا د بهرنیو چارو وزارت مرستیالې الیس ویلز، د کابل تر سفر وروسته ویلي، خوښه ده چې د افغانستان د ولسمشریزو ټاکنو نوماندانو د پایلو د منلو ژمنه کړې ده.
ویلز په واشنګټن کې له خبریالانو سره په خبرو کې ویلي، چې په کابل کې يې د رایو پر شفافو او با اعتماده پروسس او همداراز د ټاکنو د ادارو پر وړتیا ټینګار کړی، څو پرته له فشار او مداخلې څخه دغه لړۍ پرمخ لاړه شي.
ټاکل شوې وه چې د ولسمشریزو ټاکنو لومړنۍ پایلې د تیرې شنبې په ورځ اعلان شوې وای، خو د ټاکنو کمېسیون د تخنیکي ستونزو او یوشمېر داخلي اختلافاتو له امله د پایلو اعلان وځنډاوه.
بلې خوا بیا یوشمېر نوماندان وایي، که غیر بایومیتریک رایې هم وشمارل شي؛ دوی به دخلکو له ټولو رایو څخه د نورو لارو چارو کلکه دفاع وکړي.
د الیس ویلز ډاډ او خوښي هم یقیني نه ده، تیر ته په کتو هرې جنجالي ټاکنې دامریکا په منځګړیتوب فیصله شوي، ممکن داځل هم دلوړ پوړو امریکایي چارواکو مداخلې ته اړتیا پیښه شي.
