غورځنګ
تېر ځل هم چې کله خليلزاد د سولې په باب ډېره زيات زيار ويوست او د امریکا په نمائنده ګۍ يې له طالبانو سره خبرې اترې پيل کړې، خو د خليلزاد له دومره ستونزو او مشکلاتو سره سره بيا هم ټرمپ چې کله د سولې خبر اترې بندولې نو له خليلزاد څخه يې پوښتنه هم ونه کړه چې د سولې خبرې يې تر کومه حده رسولې دي! يا يې هم د سولې په خبرو کې لاسته راوړنې څه دي او څومره ګټورې دي! طالبان څه غواړي؟ مګر د خليلزاد د لسو مياشتو خواري يې په سيند لاهو کړه او يوازې د يوه عسکر وژل يې بهانه وګرځول، د سولې خبرې او مذاکرات يې په ټپه ودرول، که څه هم د امریکا له لوري د سولې بندولو له ځانه سره ډېر زيات نړيوال او سيمه ييز غبرګونونه لرل؛ مګر امریکا بيا هم نه نړيوالو او سيمه ييزو غبرګونونه ته اعتنا وکړه او نه يې هم د خليلزاد هڅو او کوښښونو ته وکتل بلکې په يوه ټويټ يې د سولې خبرې بندې کړې.
اوس چې بيا خلیلزاد په نړيوالو او سيمه ایيزو هېوادونو باندې ګرځي تر څو د سولې په باب خبرې له هماغه ځايه بېرته پيل شي، په کوم ځای چې په ټپه درېدلې وې، اوس په نړۍ کې يو ځل بيا مشهوره شوې او هر څوک غواړي چې امریکا دې له طالبانو سره د سولې خبرې له هماغه ځايه بېرته پيل کړي په کوم ځای چې امريکا بندې کړې وې، د ناټو سرمنشي، په امريکا کې د کانګرېس غړو، د امریکا د ولسمشرۍ ماڼۍ بېلابېلو غړو دغه رنګه غوښتنې کړې وې چې د همدغو خبرو له امله خليلزاد يو ځل بيا د سولې په نامه راوتلی دی.
که څه هم تېرې خبرې د خليلزاد په هڅو او کوښښونو پيل شوې وې، او تمه ده چې دا ځل بيا هم د دغو خبرو د پيل کېدو اېواډ خليلزاد تر لاسه کړي، خو خليلزاد بايد يوه ټکي ته پام وکړي، چې له امریکا دې د خپل صلاحيت پوښتنه او غوښتنه وکړي او د امریکا له لوړپوړو چارواکو دې ژمنه او تعهد واخلي چې که چېرته د سولې مسوده بيا ځل چمتو شي نو د ده صلاحيت به څومره وي؟؟ امريکا خو به بيا داسې نه کوي چې په يوه ټويټ د ده د لسو مياشتو خواري عبس ولاړه شي؟؟ بيا خو به د سولې د بندېدو په باب ټرمپ ټويټ نه کوي؟؟
يا هم که چېرته خليلزاد د سولې په باب له طالبانو سره پر چمتو شوې مسودې هوکړه وکړي. نو د امریکا غبرګون به څه وي؟؟ بيا خو به داسې نه وي چې کله يې کانګرېس احضاروي او کله يې دفاع وزارت احضاروي؟
خليلزاد بايد په دومره موده کې د امريکا تېر تاریخ لوستلی وای او دا ورته معلومه وای چې امريکا خپلو خواخوږو ته څومره وفاداره ده؟ امریکايان په تېر تاريخ کې له خپلو ملګرو او خواخوږو سره څنګه برخورد لري؟
خليلزاد ته بايد د ويتنام او امریکا جنګ معلوم وای چې امريکا څنګه له خپلو خواخوږو څخه تېښته کړې وه؟ او څنګه له ويتنام په نيمه شپه کې تښتېدلي وو؟؟
تېره مياشت چې امريکا د سوريې له شمالي سيمو څخه د وتلو اعلان وکړ او بيا ترکي پوځونو په سيمه کې د امريکا د خواخوږو کُردانو په وړاندې د عملياتو تياری کاوه نو د امریکا برخورد څه وو؟ بلکې يوازې په لفظي اخطارونو او د درواغو په تړونونو باندې بناء وو!
چې اوس دا دی بيا هم کېدی شي ترکي ځواکونه خپل عمليات د کُردانو پر وړاندې پيل کړي.
نو خليلزاد بايد د امریکا تاريخ لوستلی وي او بيا پرې هغومره باور وکړي څومره چې ورسره ښايي او اوس چې يو ځل بيا خليلزاد د سولې لپاره راوتلی او غواړي چې امريکايي پوځيان له افغانستان څخه د سولې په ترڅ کې روغ رمټ وباسي نو امریکا څخه بايد پوره او عام وتام صلاحيت وغواړي، تر څو په سوله کې مهم رول ولوبوي. داسې نه چې يو ځل بيا د تېر په څېر په ډاګ پاتې شي او امريکا يې تېرې هڅې عبس او خوشې کړي.
