کابل ټکى کام (دوشنبه، ۴ لیندۍ ، ١٣٩٨ل)
د کابل ادارې مشر اشرف غني تېره ورځ ناوخته په ارګ کې د امریکا د سنا جرګې له راغلي پلاوي سره لیده کاته کړي دي.
له ارګه په خپرې شوې خبرپاڼه کې راغلي، په دې لیدنه کې دواړو لوریو پر امنیت، ښې حکومتولۍ، اقتصادي ودې او سولې پروسې خبرې اترې کړې دي.
غني په یاده ناسته کې ویلي چې په تېرو کلونو کې د امریکا مرستې د یو غښتلي مشارکت له لارې د افغانستان د انکشاف او پرمختګ لامل شوې دي.
غني دغه راز د سولې برخه کې د امریکا هڅې ستایلې دي او هیله یې ښودلې چې دا هڅې به افغانستان پایدارې سولې ته ورسوي.
دوی ویلي چې امریکا؛ افغان سولې ته د رسېدو په برخه کې جدي هڅې پیل کړې دي او په دې هېواد کې دوامداره او پایداره سوله د دوی لومړیتوب دی.
دا په داسې حال کې ده چې د طالب او امریکایي لوري تر منځ د بندیانو له تبادلې وروسته یو ځل بیا په دوحه کې مذاکرات پیل شوي، د یادو خبرو په اړه دواړه لوري څه نه وایي خو یو شمېر پټو سرچینو تاید کړي دي.
