کابل ټکی کام (سه شنبه، ۵ ليندۍ، ۱۳۹۸ل)
پرون د دوشنبې په ورځ د ایران د حکومت په زرګونو پلویانو د حکومت په ملاتړ مظاهرې وکړې، هغه مظاهرې او مظاهره کوونکي وغندل چې د حکومت په ضد يې تيره اونۍ خونړي لاريونونه کړي وو.
د راپورونو له مخې د حکومت په ملاتړ په زرګونو کسان د پلازمينې “تهران” د انقلاب په څلور لارې کې راټول شوي وو.
دوی د حکومت په ننګه د ايران ملي بیرغونه له ځانونو سره لېږدول او (مرګ په امریکا او اسرائيل) شعارونه يې ورکول.
امریکا پر ایران کلک اقتصادي بندیزونه لګولي او امریکایي چارواکو په دغه هېواد کې د حکومت ضد مظاهرو ملاتړ کړی ده.
د (فرانس پرس) د خبري آژانس خبریال وايي د حکومت په ملاتړ په ترسر شويو لاريونونو کې زاړه، واړه او د هيواد مذهبي مشران راوتلي وو.
ډېرو کسانو د ایران د مذهبي مشر ایت الله علي خامنه يي او د ايران د مذهبي ريژيم د بنسټګر ايت الله خميني تصویرونه هم له ځانونو سره لېږدول.
د يادونې وړ ده چې د ایران دولت څه موده مخکې د تيلو په بيو کې نېږدې ۲۰۰سلنه لوړ والی راوست چې له امله یې په زرګونو کسان وآټونو ته راووتل او د حکومت دا کار یې وغانده.
د راپورونو له مخې په دغو حکومت ضد لاريونونو کې باندې ۱۰۰ کسان وژل شوي دي، خو د ایران حکومت دغه شمیرې له واقعیت لوړې او خیالي گڼلې دي.
د ایراني چارواکي په وينا چې ورانکارو د ایران د دښمنانو -امریکا، اسرایل او سعودي عربستان- په مشورې مظاهرې په تاوتریخوالي بدلې کړې.
