کابل ټکی کام (يکشنبه، ۱۰ ليندۍ، ۱۳۹۸ل)
د عراق پارلمان نن یکشنبه د (دسمبر ۱) د دغه هیواد د لومړي وزير عادل عبدالمهدي استعفا ومنله.
له سختو او خونړيو لاريونونو وروسته د عراق لومړي وزیر ‘عادل عبدالمهدي’ د جمعې په ورځ پارلمان ته خپله استعفا وړاندې کړې وه.
عراق کې له نږدې دوو میاشتو راهېسې مظاهرې روانې دي، چې د مظاهره کوونکو یوه غوښتنه د صدراعظم استعفا وه. د راپورونو له مخې دغو مظاهرو کې تر اوسه شاوخوا ۴۲۰ کسان وژل شوي دي.
د یادونې وړ ده چې مظاهره کوونکو څو ورځې مخکې په ‘نجف’ کې د ایران قونسلګرۍ ته هم اور اچولی و
د عراق تر ټولو ستر مذهبي مشر ایت الله علي سیستاني هم د لاريون کوونکو ملاتړ کړی او له پارلمان څخه یې غوښتي چې زر تر زره د نویو ټاکنو لپاره قانون جوړ کړي.
د وزيراعظم له استعفاء منلو وروسته د دغه هيواد د پارلمان مشر وایي چې د ولسمشر ‘برهم صالح’ څخه به د نوي لومړي وزير د معرفي کولو غوښتنه وکړي.
