کابل ټکى کام (پنجشنبه، ۲۱ لیندۍ ، ١٣٩٨ل)
د قطر په پلازمینې دوحه کې د طالبانو د سیاسي دفتر مذاکراتي ټیم غړي او ویاند سهیل شاهین پر خپل ټویټر لیکلي چې د ملا برادر او خلیلزاد په مشرۍ د مذاکراتي ټيم غړو نن هم مثبتې خبرې لرلې.
شاهین زیاته کړې، د دواړو لوریو د پریکړې له مخې به خبرې د څو ورځو مشورو او وقفې څخه وروسته بیرته پيل شي.
سیاسي شنونکي وایي چې روان پړاو مذاکرات به مثبتې پایلې ولري او ژر به دتوافقنامې په لاسلیک سره بین الافغاني خبرې پیل شي.
د امریکا دبهرنیو چارو وزیر مایک پومپیو هم د باګرام له پروني برید وروسته د مذاکراتو پر دوام ټینګار کړی او ویلي یې دي چې دا بریدونه به سولییزه پروسه متوقفه نه کړي.
