نیشنل اینټرسټ: افغانستان کې دامریکا بریا ناممکنه ده
کابل ټکى کام (سه شنبه، ۳ مرغومی ، ١٣٩٨ل)
نیشنل اینټرسټ مجلې د امریکایي مشرانو له لوري د افغان جګړې تحریف ته په اشارې لیکلي، په افغان جګړه کې د واشنګټن بریا ناممکنه ده؛ باید پای ته ورسول شي.
افغانستان کې د امریکا د سیاستونو څارونکی ډانیل ډیویس په دې مقاله کې د واشنګټن پوسټ له لوري افشا شویو اسنادو ته په اشارې لیکي، دا اسناد ددې ښکارندویي کوي چې امریکایي مشرانو د افغان جګړې په اړه واقعیتونه د دې لپاره پټ کړي وو چې په دې هېواد کې د روانې جګړې د ګټلو لپاره خپلې ناکامې پرېکړې توجیه کړي.
د مقالې په یوه برخه کې لیکل شوي، امریکایي مشرانو سره له دې چې په دې هېواد کې یې د جګړې د ګټلو هیلې له لاسه ورکړې وې خو تېرو دریېو دولتونو د دې بې مانا جګړې د ګټلو لپاره امریکایي نظامیان قرباني کړل او بل شوی اور یې لا تازه کړ.
مقالې د واشنګټن پوسټ ورځپاڼې اسناد هیله بښوونکي بللي او لیکلي یې دي، دا اسناد ممکن د دې باعث شي چې د ټرمپ په مشرۍ امریکایي اداره د مخکینیو سیاستونو پر خلاف افغان جګړه ختمه او امریکایي سرتېري خپلو کورونو ته ستانه کړي.
واشنګټن پوسټ نږدې یوه میاشت وړاندې د افغان جګړې په اړه پارونکي اسناد خپاره کړل، دې ورځپاڼې په ښکاره ډول ادعا وکړه چې امریکایي حکومتونو په دې اړه خپل ملت ته درواغ ویلي چې باید محاکمه شي.
