(کابل ټکی کام، ۱۳۹۸ مرغومی ۵، پنجشنبه)
د ګوانتنامو افغان زنداني مولوي حمدالله تره خيل چې تازه له بنده خوشې شوی وايي، له اتلس کلن زندان وروسته لا هم په دې نه دی پوه شوی چې په څه جرم امريکايانو نيولی او زندان ته اچولی و.
مولوي حمدالله تره خيل اتلس کاله مخکې د امريکايي ځواکونو له لوري له نيول کيدو وروسته لومړی بګرام او هلته تر څلور مياشتو تيرولو وروسته ګوانتنامو زندان ته لېږل شوی دی.
نوموړی وايي، چې دی به په امریکايانو او د کابل پر حکومت عريضه وکړي ځکه چې دی يې په هيڅ کوم جرم اتلس کاله زندان ته اچولی زياتوي په ګوانتنامو کې تر ټولو زيات افغانان زندانيان و چې تعداد يې درې سوه ته رسيده.
هغه په خپله تازه مرکه کې ويلي، چې په ټولو زندانونو کې ورسره ظلمونه شوي خو په وينا يې کله چې درې کاله مخکې د امارتو هيواد د ده په شمول څو تنه نور د ميلمنو په شکل قبول کړل نو تر ټولو زيات ظلمونه او شکنجه ورته په اماراتو کې ورکول شوې ده.
د حمدالله تره خيل په وينا:”اماراتيانو په مونږ باندې هيڅ قسمه حجت نه درلوده، د ميلمنو په صفت يې قبول کړلو او شديدترینه ظلم يې په مونږ باندې وکړلو چې نه مو باګرام کې ليدلی و او نه مو ګوانتنامو کې “ زياتوي د دغه ظلم او شکنجو پوښتنه به هم له حقوق بشر او بين الملل سره راپورته کوي او هلته به پرې عريضه وکړي.
نوموړی زياتوي، په اماراتو کې چې مونږ د ميلمنو په صفت ورغلي و، د تشناب او اطاق تر منځ مو پنځه متره لار وه خو چې کله به تشناب ته تلو نو لاسونه او پښې به يې راته ولچک کولې، کميس او پرتوګ به يې رانه ښکل، سترګې به يې راته تړلې او بيا به يې تر لاسو نيولي تشناب ته وړلو.
نوموړي ګواښ وکړ که حقوق بشر او بين الملل يې له ده سره د شوي ظلم پوښتنه ونه کړي نو په کابل کې به يې دفترونه ور وتړي.
مولوي حمدالله تره خيل د کابل ده سبز اوسيدونکی، د مشهور عالم مولوي تره خيل زوی او د حزب اسلامي غړيتوب لري.
