(کابل ټکی کام، ۱۳۹۸ مرغومی ۵، پنجشنبه)
د افغانستان پخوانی ولسمشر حامد کرزي په تازه مرکه کې ويلي چې افغانستان ازاد نه دی ، د افغانستان ټاکنې د افغانانو په لاس کې نه دي بلکې دغه ټاکنې د بهرنيانو د معاملو یوه لړۍ ده.
حامد کرزي د وي او ای پښتو تلويزيون سره په تازه مرکه کې ويلي، چې پخوا يې هم ټينګار کړی چې دغه ټاکنې به افغانستان بحران ته بوزي زياتوي (ټاکنې یوازې په ازاد افغانستان کې کيدلی شي، وطن مو ازاد نه دی، وطن مو د پرديو په لاس کې دی، په ۲۰۰۹م کې هم انتخابات زمونږ په لاس کې نه و، دا د بهرنيانو د معاملو لړۍ ده، د امریکا په شمول ځينې نور هيوادونه د خپلو ګټو لپاره انتخاباتو کې دخيل دي).
حامد کرزي په دغه مرکه کې ويلي، تر هغې چې مو سوله، ازادي او خپله واکمني نه وي پيدا کړي انتخابات هم زمونږ په لاس کې نه وي.
هغه د سولې روانو خبرو په اړه وويل، هيڅکله د مؤقت حکومت پلوي نه کوي، سوله هله راتلای شي چې افغانان خپلو کې سره کښيني، کابل حکومت دې د طالبانو له حکومت سره د خبرو ميز ته کښيني تر څو سوله راشي.
نوموړي وويل، چې امريکايان دې د طالبانو د بريدونو او اوربند په بهانو د مذاکراتو د روانې لړۍ ځنډول يا تخريبول پريږدي.
کرزی وايي، امريکايان نه پريږدي چې طالبان او سياستوال سره د مذاکراتو لپاره کښيني او دغه راز وايي چې له کومې ورځې راهيسې امريکايانو مذاکراتو پيل کړي له هغې راهيسې يې تر ټولو سترې بمبارۍ پيل کړي، چې امريکايان بمبارۍ بندې کړي نو طالبان به هم بريدونه کم کړي (دا نه کيږي چې امريکايان په ښکاره د اوربند نعرې وهي خو په پټه اور لګوي).
حامدکرزي د امریکايي ځواکونو او پر افغانستان د هغوی د یرغل سره سم په افغانستان کې دوه دورې ولسمشر پاتې شوی او د نوموړي د واکمنۍ پر مهال هم امريکايي او نورو بهرنيو ځواکونو په بمباريو، چاپو او عملياتو کې لسګونه زره افغانان وژلي او شکنجه کړي دي.
