کابل ټکی کام (شنبه، ۴ چنګاښ، ۱۴۰۱ل)
په داسې حال کې چې په “الاقصی” جومات کې اسراییلي اشغالګرو یوځل بیا په لمونځ کوونکو بریدونه کړي د فلسطین د اسلامي مقاومت غورځنګ “حماس” خبر داری ورکړی، چې د اشغالګرو بریدونو ته به ځواب وایي او په خبره یې دوی جګړې ته چمتو دي.
د حماس غورځنګ د پوځي څانګې “القسام” ویاند “ابوعبیده” په خپلو تازه څرګندونو کې ویلي، چې په الاقصی جومات کښې د صهیونیست رژیم جنایتونه دوام لري، دوی لاس تر زنې نه شي کیناستلی او د جګړې لمن به د پلازمینې “تل أبیب” په ګډون د اسراییلو نورو ښارونو ته هم وغځوي.
د ابوعبیده په خبره صهیونیستان هره ورځ په الاقصی جومات باندې یرغلونه کوي داسې یرغلونه چې د صهیونیست رژیم د چارواکو په ملاتړ سره ترسره کیږي او هغه په الاقصی جومات کښې د ځای او د مکان د ویش د تپلو په هدف سره د نیواکګرانه هڅو د بشپړولو لپاره کوي.
د حماس غورځنګ ویاند په “الاقصی جومات “کښې د فلسطینی ولس د آزادۍ په هدف له صهیونیست نیواکګر رژيم سره د جګړې د لمن د پراخولو غوښتنه کړې او ټولو فلسطیني مقاومتي ډلو ته یې بلنه ورکړې چې د اشغالګرو د دغو شومو پلانونو د ناکامه کولو لپاره دې د دوی ملاتړ وکړي.
نوموړی وایي دا خبره امکان نلري چې مقاومت د قدس د نیواکګر رژيم د جنایتونو په وړاندې غلي پاتې شي او دغه رژیم به د خپلو جنایتونو د تر سره کولو درنه بیه پرې کوي.
باید وویل شي قدس ښار چې هلته د مسلمانانو لومړۍ قبله “مسجد الاقصی” شتون لري د فلسطین یوه نه جلا کیدونکي برخه بلل کیږې او تر مکې مکرمې او مسجد نبوي وروسته د اسلامي لپاره تر ټولو سپیڅلی ځای دی.
