کابل ټکی کام (يکشنبه، ۲ زمری، ۱۴۰۱ل)
د افغانستان بانک وايي، چې ددغې بانک د ستر اقتصادي سلاکار ښاغلي لطف الحق نور پسرلي پر مشرۍ د چین هیواد د سوداګرو له یوې ډلې سره يې ناسته ترسره کړې ده.
د افغانستان بانک د ورکړو معلوماتو له مخې، په دې غونډه کې د بانکي اړیکو د پراختیا، راکړو او ورکړو، سوداګرۍ د ودې او یو شمېر نورو اړوندو موضوعګانو په اړه هر اړخیزې خبرې او د نظرونو تبادله تر سره شوه.
د بانک له لوري په خپره شوې خبرپاڼه کې راغلي، چې د افغانستان بانک د هیواد د مرکزي بانک په توګه ژمن دی چې له ټولو نړیوالو هېوادونو، په ځانګړې توګه له مالي او بانکي بنسټونو سره د نړیوالو قوانینو او مقرراتو په رڼا کې غوره بانکي اړیکې ولري او دې اړیکو ته تر بل هر وخت زیاته پراختیا ورکړي.
