کابل ټکی کام (چهارشنبه، ۵ زمری، ۱۴۰۱ل)
پاکستاني رسنۍ وایي، چې د یاد هیواد سترې محکمې اعلان کړی، چې د پخواني لومړي وزیر او د تحریک انصاف ګوند د مشر “عمران خان” استازی “پروېز الهي به د پنجاب ایالت اعلی وزیر وي او د اوسني اعلی وزیر “حمزه شهباز” دنده او پرېکړې یې ناقانونه بللې دي.
سترې محکمې د بنجاب ایالتي پارلمان کې د وزیر اعلی د ټاکنې په تړاو د پارلمان د مرستیال مشر پرېکړه رد کړې او په خبره یې د دې پرېکړې لپاره هېڅ قانوني دلیل موجود نه وو.
د محکمې په پرېکړه کې راغلي: د وزیر اعلی په توګه د مسلم لیک “ن” ګوند د نوماند حمزه شهباز ټاکل ناقانونه ګام و، ځکه د نوموړي په مقابل کې د مسلم لیک “ق” ګوند غړي او د تحریک انصاف ګوند کاندید پروېز الهی ډېرې رایې ترلاسه کړې وې او باید هغه بریالی بلل شوی وای.
په ورته مهال پخواني لومړي وزیر عمران خان پروېز الهي ته د بریا مبارکي ویلي، د سترې محکمې پرېکړه یې ستایلې ده او د پاکستان ولسمشر عارف علوي تیره شپه ناوخته نوموړي ته لوړه ورکړې ده؛ خو د واکمن ګوند مرستیالې مشرې “مریم نواز” د حمزه شهباز ګوښه کېدل او د وزیر اعلی په توګه د پروېز الهی ټاکنه قضایي کودتا بللې ده.
باید وویل شي، چې د پروېز الهي تر ټاکل کېدو وروسته په پنجاب ایالت کې هم د تحریک انصاف ګوند حکومت رامنځته شو په داسې حال کې چې په صوبه خیبر پښتونخوا کې هم د تحریک انصاف ګوند حاکم ده، په صوبه بلوجستان کې ایتلافي حکومت ده او په سند صوبه کې د پاکستان د خلکو ګوند حکومت کوي د کتوونکو په باور تر دې وروسته به د مسلم لیک ګوند مشر شهباز شریف یوازې د اسلام اباد لومړی وزیر بلل کیږي چې باید له خپلې دندې استعفا ورکړي او هر څه ژر نوې ټولټاکنې ترسره شي.
