کابل ټکی کام (جمعه، ۱۴ زمری، ۱۴۰۱ل)
افغان حکومتي چارواکو هند ته د اریانا افغان هوايي شرکت د الوتنو بېرته له سره د پیلولو خبر ورکړی دی.
دغه الوتنې د ۲۰۲۱ کال اګسټ میاشت کې د مخکيني حکومت تر سقوط وروسته، ودرول شوې.
حکومتي چارواکو پرون پنجشنبه د (زمري ۱۳مه) وويل، چې له یو کال ځنډ وروسته به له کابله د هند ډیلي ته د اریانا افغان هوايي شرکت لومړنۍ الوتنه د راتلونکې جمعې په ورځ وشي.
دغه راز نن جمعه د اريانا افغان په رسمي فسبوک پاڼه خبر ورکړل شوی چې دغه هوايي شرکت نن د هند ډيلي ته يو پرواز لري.
پر کابل د طالبانو تر واکمنۍ وروسته که څه هم ځينو هېوادونو ته پروازونه بند شوي خو تر يوڅه ځنډ وروسته اريانا ایران، روسیې، متحده عربي اماراتو، پاکستان، قطر او ترکیې ته هم خپلې الوتنې په عادي ډول پیل کړې.
د يادونې ده، چې هند پر کابل د طالبانو له واکمنېدو وروسته خپل سفارت وتاړه، خو د روان کال جون میاشتې لومړیو کې یې یو تخنیکي ټیم کابل ته استولی و چې هلته خپل دیپلوماتیک فعالیت بېرته پیل کړي.
