کابل ټکی کام (سه شنبه، ۱۸ زمری، ۱۴۰۱ل)
د پاکستاني طالبانو غورځنګ یا ټي ټي پي د افغانستان په پکتیکا ولایت کې د خپلو درې مهمو قوماندانانو وژل کېدل منلي او د غچ اخیستلو خبرداری یې ورکړی دی.
د پاکستاني طالبانو غورځنګ د یوې اعلامیې په خپرولو سره ویلي، چې د دوی درې مهم قوماندانان عمر خالد خراساني، حافظ دولت، او مفتي حسن یکشنبه ناوخته د افغانستان په پکتیکا ولایت کې وژل شوي دي.
پاکستاني طالبانو د خپلو مشرانو په وژلو کې پاکستاني استخبارات پړه بللي او په خبره یې غچ به یې اخلي.
په ورته مهال یو شمېر پاکستاني رسنیو د ځیني پوځي چارواکو چې نومونه یې نه دي په ډاګه شوي خبر ورکړی، چې د پاکستان پوځ پکتیکا ولایت کې ځانګړي عملیات ترسره کړي خو دا یې نه دي ویلي، چې عمر خالد خراساني او ملګري یې په دغو عملیاتو کې وژل شوي که څنګه.
په لومړیو کې ویل کیدل چې د پاکستاني طالبانو دغه مهم قوماندانان د سړک غاړې ماین چاودنه کې وژل شوي؛ خو اوس ځینې سرچینې وایي، چې یاد کسان د بې پیلوټه الوتکې په برید کې وژل شوي دي.
باید وویل شي چې تر دې دمه اسلامي امارت او پاکستاني چارواکو په دې هکله رسما څه نه دي ویلي.
