کابل ټکی کام (سه شنبه، ۱۸ زمری، ۱۴۰۱ل)
د هیواد پخواني ولسمشر “حامد کرزی” په خپلو تازه څرګندونو کې ویلي، چې اوسنی حکومت باید د نړیوالې ټولنې غوښتنې ومني.
نوموړي د امریکا له عامه راډیو سره په یوه مرکه کې د افغانستان د وضعیت او د امریکايي ځواکونو پر وتلو هم خبرې کړې دي.
کرزی یو ځل بیا پر امریکا د ملکي وګړو د وژلو او بمبار له امله نیوکه کړې ده او وایي امریکایانو دومره ملکیان ووژل چې نور نو پر ملکیانو برید په هېڅ صورت تېروتنه نه شو بللی.
د پخواني ولسمشر په خبره پر ملکي وګړو قصدا بریدونه کېدل او امریکا ځينې داسې ګروپونه روزلي وو چې دوی تر امریکايي عسکرو هم د افغانانو پر وړاندې ظالمانه چلند کاوه.
هغه د اوسني وضعیت په اړه هم اندېښنه ښوودلې ده او وایي چې په ټول افغانستان کې امنیت تامین دی، خو د خلکو اقتصاد کمزوری دی، بېکاري ډېره شوې ده، له هېواده د خلکو وتل ادامه لري چې دا هر څه د افغان ټولنې لپاره یو ناورین بلل کېږي.
