کابل ټکی کام (یکشنبه، ۲۷ وږی، ۱۴۰۱ل)
افغانستان او ايران د يوې نوې سوداګریزې لارې د پرانيستلو په لټه کې دي.
ټاکل شوې ده دغه لاره په نيمروز کې د وريښمو پله د لارې ترڅنګ جوړه شي.
د نيمروز د صنعت او سوداګرۍ رييس “مولوي فاضل محمد فضلي” ویلي، چې د نوې لارې په جوړوېدو سره به د افغانستان او ايران ترمنځ د راکړې ورکړې بهير ګړندى شي.
په ورته مهال ملي سوداګرو د ايران او افغانستان ترمنځ د ترانزيت د نوې لارې جوړولو په برخه کې د اسلامي امارت په مشرۍ د افغان سرپرست حکومت هڅې ستایلې دي.
د سوداګرو په خبره، چې په نيمروز کې د افغانستان او ايران ترمنځ د ترانزيت د نوې لارې په جوړېدو سره به د سوداګریزې راکړې ورکړې بهير ګړندى شي.
د نيمروز د صنعت او سوداګرۍ خونې مدير “نجيب الله خاشرودي” وايي چې د افغانستان او ايران ترمنځ د ترانزيتي نوې لارې په پرانيستلو سره به د دولت عوايد زيات شي او سلګونو ځوانانو ته به د کار زمينه هم برابره شي.
باید وویل شي چې اوسمهال هم د ورېښمو پله پر لاره هره ورځ سلګونه سوداګریز کاروانه تګ راتګ کوي.
