کابل ټکی کام (شنبه، ۲۳ تله، ۱۴۰۱ل)
د افغانستان اسلامي امارت وايي، د امریکا لخوا د ښځو د زده کړو د ځنډ په پلمه د “اسلامي امارت” پر ځینو مشرانو د سفرونو د بنديز اعلان د افغانستان له ملت سره د خواخوږۍ له مخې، نه بلکې امریکا په افغانستان کې د خپلو اهدافو لپاره د نورو پلمو په لټه کې ده.
دا په داسې حال کې ده، چې د امريکا د بهرنیو چارو وزارت دوه ورځې مخکې د نجونو د نړيوالې ورځې په مناسبت اعلان وکړ، چې د افغانستان د سرپرست حکومت هغه مشران او مسوولین چې د نجونو د ښوونځيو په تړلو کې لاس لري، پرې د ويزو او سفرونو محدوديتونه لكوي.
د اسلامي امارات په مشرۍ د افغان سرپرست حکومت مرکزي ویاند “ذبیح الله مجاهد” پر خپله ټویټرپاڼه لیکلي، چې: افغانستان یو خپلواک او مستقل هېواد دی او د افغانستان اسلامي امارت مستقل، د خپلې ارادې خاوند او خپلو دیني او کلتوري ارزښتونو ته ژمن نظام دی. مجاهد ويلي، لکه څنګه چې د افغانستان اسلامي امارت د بل هېڅ کوم هېواد په داخلي موضوعاتو کې مداخله نه کوي، له نورو ټولو هيوادونو څخه ورته تعامل خپل حق بولي او ورنه غوښتنه يې کوي.
