کابل ټکی کام (جمعه، ۸ ثور، ۱۴۰۲ل)
د راپورونو له مخې په سوډان کې د سیالو پوځي ډلو ترمنځ د درې ورځني اوربند تر پای ته رسېدو وروسته یوځل بیا د پلازمینې خرطوم په ګډون د یاد هېواد په ډېرو ښارونو کې خونړۍ جګړې پیل شوې دي.
دغه اوربند چې له دغه هیواد څخه د بهرنیو دیپلوماتانو او د هغوی د کورنیو د ایستلو لپاره د امریکا او ملګرو ملتونو په غوښتنه رامنځته شوی و نن په ځای وخت ۱۲ بجې پای ته رسېدلی ده؛ چې ورسره سم یوځل بیا سختو جګړو زور اخیستی او په پایله کې یې یواځې نن ورځ ۴۰ کسان وژل شوي او تر سلو نور ټپیان دي.
په ورته مهال داسې نا تایید شوي راپورونه هم خپاره شوي چې ترکیه غواړي د لیبیا په څېر په سوډان کې هم مداخله وکړي او د سوډاني پوځ او نیمه پوځي ځواک ترمنځ روانو خونړیو جګړو ته د پای ټکی کیږدي.
باید وویل شي چې په سوډان کې د واک پر سر د اختلاف له امله د روانې میاشتې اپریل میاشتې په ۱۵ نېټه د دغه هېواد د پوځ او د نیمه پوځي ځواک ترمنځ سختې نښتې پیل شوي چې تر اوسه پکې د ګڼ شمېر ملکیانو په ګډون ۸۰۰ کسان وژل شوي او زرګونه نور ټپیان دي.
