د سوډان جګړه؛ پر پلازمېنه خرطوم خونړیو هوايي بریدونو کې ۱۰۰ کسان وژل شوي
کابل ټکی کام (یکشنبه، ۲۸ جوزا، ۱۴۰۲ل)
د سوډان پلازمېنه خرطوم کې په یوه تازه هوايي برید کې ۱۰۰ کسان وژل شوي دي.
دا برید د خرطوم په “یرموک” ناحیه کې شوی چې د ملکي استوګنې له ګڼې ګوڼې یوه ډکه سیمه ده.
چارواکو ویلي چې د شنبې ورځې په دغه برید کې شاوخوا ۲۵ کورونه ویجاړ شوي دي.
د چټک غبرګون ځواکونو یا ‘ار اېس اېف’ ملیشې د جون لومړیو کې ویلي وو چې پر یرموک سیمې یې بشپړه ولکه ټینګه کړې.
دا ځای ځکه مهم دی چې د وسلو جوړولو یوه ستره کارخونه پکې پرته ده.
دغه برید تر هغې یوه ورځ وروسته شوی چې د سوډان یوه جګپوړي پوځي جنرال پر ‘ار اېس اېف’ ملېشې د بریدونو ګواښ وکړ.
د سوډان پوځ او چټک غبرګون ځواکونو ترمنځ د واک پر سر شخړه د اپریل میاشتې نیمايي کې راپورته شوه.
په دې موده کې که څه هم د دوی ترمنځ خونړیو نښتو کې ګڼ کسان وژل شوي، خو د کره شمېر مالومول یې ګران دي.
اټکل دا دی چې د ملکيانو په ګډون د دې جګړې د قربانیانو شمېر پر ۱۱۰۰ تنو اوړي.
پر دې سربېره شاوخوا ۲ اعشاریه ۲ میلیون کسان بې ځایه شوي هم دي چې د ملګرو ملتونو په وینا تر نیمايي ډېرو یې ګاونډیو هېوادونو ته پناه وړې ده. چې له ډلې یې ډېر خلک ګاونډي چاد هیواد ته تښتېدلي دي.
