دادمحمد ناوک
شېبه وړاندې مې په هند کې د مسلمانانو له ځوره ډک ژوند د یوې لیکنې ژباړه خلاصه کړه، چې کله مې نیټ ته سر ورښکاره کړ، د چین په ایغور کې د مسلمانو مېرمنو د عفت له تروړو نوې خبرې وې، وړاندې لاړم او د برما د مسلمانانو په لټه شوم، د نړۍ په ګوټ ګوټ کې د امت د ځپلو، سره بېلولو، وژلو او د ځمکې له مخې د مسلمان فکر د ختمولو دې زورونو ته حیران شوم؛ دا چې لا هم له دومره تبلیغاتي او نظامي خنډونو سره اسلام پر مخ روان دی او حتی د اروپا زړه کې تازه سا پو کوي، نو د نن عصر مغرور غولېدلی انسان باید درک کړي چې دا الهي لمر د دوی په پو کولو پو کولو نه ورکېږي!
وړم کال هندي چارواکو یوازې اسام ایالت کې میلیونونه مسلمانان پردي اعلام کړل، تابعیتونه يې ور لغوه کړل او اعلان يې وکړ چې غواړي په پرلپسې ډول اوه میلیونه مسلمانان له هنده وشړي او د پنځو میلیونو تذکرې لغوه اعلام کړي، هندي چارواکو ویلي و، چې د دوی جرم دا دی چې «د ناسم خدای عبادت کوي او په ناسمه ژبه خبرې کوي.»
د هند د نوي قانون (۲۰۱۹/۱۲/۱۲) له مخې مسلمان کډوال ته په دې هېواد کې ځای نشته، خو مسیحیان، بودایان، جنیان او نور اقلیتونه اوس د یوولس کاله پر ځای په پنځه کاله کې د هند تابعیت اخیستلی شي، هند تر دې هم وړاندې لاړ او حتی د کرونا ویروس پړه يې پر مسلمانانو ور واچوله او تېر کال يې په اوتارپرادش ایالت کې یو مسلمان ځوان ته له دې امله اور ور واچاوه چې له هندوانو سره يې د «جی شری رام» شعار نه و بدرګه کړی! «هند کې د مسلمان ځورونې د تازه لومې په اړه زما یوه پخوانۍ ژباړه [د مینې ج/ه/ا/د] انټرنیټ کې موندلی شئ!»
#چین کې نږدې دوه میلیونه مسلمان ځوانان، مېرمنې او ماشومان زندان کې پراته دي، چې تر پرلپسې تېریو لاندې دي، خو چیني دولت وايي دوی يې له «افراطه» را ګرځولي! خو مسلمانان په شرقي ترکستان «سین کیانګ» کې ږېرې نه شي پرېښودلی، ځیرک موبایل نه شي اخیستلی، له هېواده بهر اړیکه نه شي نیولی، په کور کې ورزشي توکي او خوراکي توکي نه شي ذخیره کولی، مېرمنې يې حجاب باید مراعات نه کړي او ماشومان يې باید دیني زده کړه ونه کړي! مسلمانان د پاسپورټونو حق نه لري او که د چین هېواد له لوري د شپږویشتو حساسو هېوادونو له ډلې په کوم هېواد کې د چا د کورنۍ غړی میشت و، کورنۍ يې باید مسلسله وپلټل شي، چې دې هېوادونو کې افغانستان هم دی! «مایا وانګ؛ د بشري حقونو د چیني برخې څېړونکې».
برما کې وضعیت لاندې لوستلی شئ، خو پر دې ټولو جنایاتو د ملګرو ملتونو په نوم طاغوت چوپه خوله دی، کله کله د خپلو سیاسي مصلحتونو په خاطر کومه خبره وکړي، دې ته سخته اړتیا ده چې پر نړۍ اسلام واکمن او بشر د شرافت خپلې درجې ته را وګرځوي!
روهینګا په #برمانا کې د هغې سیمې نوم دی چې شاوخوا اته میلیونه نفوس لري، ټول مسلمانان دي، خو د ټولې برما څلور سلنه جوړوي، د برما د نفوس اویا سلنه بودایان دي، په دې هېواد کې له مسلمانانو سره د بودایانو ظلمونه، وژنې، شکنجې، تېري، په اور سوځول… دوه کاله وړاندې د رسنیو سرټکي و، سلګونه زره مسلمانان يې په زور له خپلې خاورې وشړل چې ډېر يې #بنګله_دېش ته کډوال شول او د ژوند چلولو لپاره حتی ځينې کورنۍ عفت پلورلو ته اړ شوې دي؛ خو هغوی چې پخپله خاوره کې پاتې دي، راځئ لږ يې له حاله خبر شو:
۱. مسلمانانو ته د پېژندنې کارت نه ورکول کېږي، چې په دې ډول نه په کور د ننه نه له هېواده د باندې سفر کولی شي.
۲. که کوم مسلمان له کوم کلي بل کلي ته ځي، نو دولت ته د ماليې په نوم باید ټاکلې پیسې ورکړي.
۳. په پوهنتونونو کې د مسلمانانو زده کړه منعه ده!
۴. په دولتي ادارو کې مسلمانان دنده نه شي ترسره کولی!
۵.تر ۴۰زره ډېر مسلمان ماشومان له دې امله په ځانګړي ډول له هر ډول حقونو او تذکرې بې برخې دي چې والدینو يې د ودونو لپاره له دولته اجازه نه وه اخیستې!
۶. مسلمانې کورنۍ مجبورې دي چې هر کال د کورنۍ د ټولو غړو یو ګډ تصویر واخلي او دولت ته يې وسپاري، که کوم ماشوم نوی پیدا کېږي، کوم غړی وفات کېږي دولت ته باید د ماليې په نوم ټاکلې پیسې ورکړي!
۷. د بېګاري لپاره دولت حق لري په زور مسلمانان بېګار کړي!
۸. د دولت تر چتر لاندې د مسلمانانو په سیمه کې روغتيايي، د ښوونې او روزنې، اقتصادي… هیڅ خدماتي بنسټ نشته.
۹. مسلمان د ځمکې او کروندې د مالکیت دعوه نه شي کولی!
۱۰. مسلمانان د دولت له اجازې پرته جومات او مدرسه نه شي جوړولی، ځکه خو له ۲۰ کلونو راهیسې هیڅ جومات او مدرسه نه ده جوړه شوې!
۱۱. که مسلمان کوم دوکان یا کاروبار پیلوي باید یو بودايي ورسره شریک کړي، بودايي په دې شراکت کې یوه روپۍ هم نه اچوي، خو ګټه باید مفته په نیمايي ور تقسیم شي! «بېلابېلې انټرنیټي ویبپاڼې»
د امت د بیدارۍ او یووالي په هیله!
