کابل ټکی کام (یکشنبه، ۱۸ چنګاښ، ۱۴۰۲ل)
د رياست الوزراء کفيل او سياسي مرستيال مولوي عبدالکبير وړمه ورځ په سپېدار ماڼۍ کې د « فان چينا افغان» د کانونو د پروسس او سوداګرۍ شرکت له عمومي رئيس فان او په افغانستان کې د دې شرکت له رئيس سيد حبيب شاپور سره وليدل. په دې ناسته کې د ياد شرکت مسئولينو په افغانستان او نورو هيوادونو کې د دې شرکت د فعاليتونو او خدمتونو په اړه د رياست الوزراء کفيل او سياسي مرستيال ته معلومات ورکړل وې ويل، لېوال دي چې په افغانستان کې پانګونه وکړي.دوی زياته کړه: په راتلونکو څو مياشتو کې به دا شرکت د کابو ۳۵۰ ميليونو ډالرو په ارزښت په افغانستان کې د برېښنا د توليد، د سيمنټو د فابريکې په جوړولو او د روغتيايي سکتور په برخه کې پانګونه وکړي. د دوی په وينا، موږ د مسلکي او متخصصو افرادو په درلودلو سره عملياتي پلانونه لرو، چې ژر به په افغانستان کې پلي شي. دوی په افغانستان کې د پانګونې د جلب او د سوداګرو د هڅولو په موخه خپل وړانديزونه هم د رياست الوزراء له کفيل او سياسي مرستيال سره شريک کړل. د رياست الوزراء کفيل او سياسي مرستيال مولوي عبدالکبير له ټولو پانګوالو او سوداګريزو شرکتونو مننه وکړه، چې په سختو شرايطو کې يې افغانستان نه دي هېر کړي او دلته په مختلفو برخو کې پانګونه کوي. نوموړي په کور دننه او بهر پر ټولو پانګوالو غږ وکړ، چې په افغانستان کې د پانګونې لپاره له بل هر وخته ښه فرصت راغلی او له دې فرصت څخه په استفادې دې په افغانستان کې پانګونه وکړي. د رياست الوزراء کفيل او سياسي مرستيال وويل: اسلامي امارت د پانګوالو او سوداګرو تر څنګ ولاړ او د هغوی د سر او مال د خونديتوب ډاډ ورکوي. د خپلو خبرو په پای کې څرګنده کړه، اسلامي امارت د ټولو مالي شرکتونو او پانګوالو ستونزو ته متوجه دی او د دوی ستونزې به پر وخت حل کړي.))
