کابل ټکی کام (سه شنبه، ۲۱ وږی، ۱۴۰۲ل)
افغانستان کي د ترکیې سفیر؛ جهاد ارګنای د سرپرست حکومت د کورنیو چارو له سرپرست وزیر سره په کتنه کي وویل؛ چي استانبول به په نږدې راتلونکي کي د افغانستان په اړه د مرسته کوونکو هېوادونو د غونډې کوربه وي.
د کورنیو چارو وزارت ویاند؛ عبدالمتین قانع په خپله اکس ټولنیزه پاڼه کي لیکلي؛ چي د ترکیې سفیر جهاد ارګنای د سراج الدین حقاني سره وکتل. ده وویل؛ چي په راتلونکي کي به استانبول د افغانستان په اړه د مرسته کوونکو هېوادونو د غونډې کوربه وي.
جهاد ارګنای همدا راز زیاته کړه؛ ( د افغانستان په اړه د مرسته کوونکو هېوادونو غونډه به په نږدې راتلونکي کي په استانبول کي جوړه شي؛ موږ هڅه کوو چي ګډون کوونکي هېوادونه قانع کړو؛ چي بشري مرستې په پراختیايي مرستو بدلې کړي.)
د قانع په وینا؛ د ترکیې سفیر د افغانستان اوسنی وضعیت د ډاډ وړ وباله او د سرپرست حکومت له لوري یې د هېواد د سفارت او قونسلګرۍ د امنیت د تامین له امله مننه وکړه او زیاته یې کړه؛ چي خپلو همکاریو ته دوام ورکوي.
د کورنیو چارو وزارت سرپرست په افغانستان کي د جهاد ارګناې ماموریت او د دواړو هېوادونو ترمنځ د اړیکو د ټینګښت او پراختیا په برخه کي د هغه د خدمتونو قدرداني وکړه او هیله یې څرګنده کړه؛ چي د دواړو هېوادونو ترمنځ اړیکې لاپسې پراخې شي.
