ترتیب او را ټولونه ; محمدحسن (جهادي عمري)
پۀ اونیزه فی البدیهه مشاعره کې د شاعرانو شریک شوي بیتونه!
نیټه: ۲/ربیع الثاني/۱۴۴۵
د (اسلامي ادب ګلبڼ) تر سر لیک لاندې؛ پۀ یوۀ شاعرانه محفل کې یوه لۀ ښکلا ډکه مشاعره تر سره شوه! چې انتخابي بیتونه یې لاندې راوړل شوي دي.
ـــــــــــــــــــــــــــــــــــــــــــــــــــــــــــــــــــــــــــــــــــ
بیت!
ستا اختیار به همیشه نه وي دنیا کې
په خــیالونو مرغان مه نیسه هوا کې
ارواښاد عبدالرحمن بابا (رح)
ــــــــــــــــــــــــــــــــــــــــــــــــــــــــــــــــــــــــ
محبت د مراحلو لاره نه ده
ددې لارې انتها ده ابتدا کې
محمدالله تبسم
که خپل ښه غواړې له هر چا سره ښه شه
که بد نه غواړې، بد مه غواړه په چا کې!
حفیظ الله هاتف
ډېر سرونه لاندې شوي وتی نشي
د ګردون نیلي چې ویشتي تماشا کې
محمد ابراهیم همکار
هېر مې نه دی په لمانځه کې په دعا کې
زړه مې ژاړي فلسطینه په اقصی کې
شرر ساپی
د زيتونو ونې ټولې شهيدانې
د غزې اروا جنګيږي په غزا کې
مولوي عبدالدیان تکل
د عروج برج به مې ګورې د وخت ظلمه!
یم فاتح به په مظلومه اریحا کې.
راشد جالب
چې تېرېږي په غزه کې، په اقصى کې
وينم، اورم يې د خپل زړه په درزا کې
نور الحبیب نثار
درست کفار د اسرائلو مرستې کاندي
مونږ تکړه یو پۀ ژړا او پۀ ښېرا کې
نصرت طالب
دا خو لاس د موسا ورشي چي ښامار شي
کنې هیڅ کرامت نشته په امسا کې
حیات همت
د حالاتو په تورتم کې د آرام مخ
ما ليدلی د خپل زخم په رڼا کې
هنر احمدزی
لکه څلي دې له ځانه سره یوړو
بړبوکۍ! ستا قدم څۀ ؤ پۀ صحرا کې؟
نورالله عرفان
زړه تنګون به له وړې خبرې نۀ وو
دا چې تۀ وای، حوصله به وای پۀ ما کې
احمد غازي
مــاته! هيلې مرورې را پخلا کړې
څه ضرور شته ستا د سترګو په نڅا کې!
خالد إحسان
ستا د پل خاورې سیلۍ په مخه کړي
که طوفان دی د زړګي ړنګه دنیا کې?
اسرار عواد
د لالي عطرورینې زلفې وا شوې
خوشبویانو اتڼ واچوه هوا کې
جهادي عمري
لکه یو عُمر جنت چې راسره وي
راسره دي څو لمحې د چا پۀ خوا کې
نظم الدین ندرت
ورمعلوم به وي ارزښت د سهاري ګل
چې ښکل کړی یې وي ښکلی پۀ ژړا کې
رحیم سکندر
غر هماغسې په خپل حالت ولاړ دی
زه هم هاغسې روان یمه صحرا کې
محمدالله تبسم
صد افسوس دى د ځوانۍ تر پولو اوړم
بيا هم نه راځي مثبت بدلون په ما کې
صديق الله مشال
چې ټول ښار راپسې بدې بدې وايي
وايم څه نا څه خوبي خو شته په ما کې
هنر احمدزی
ده قسمت له لاسه تل یم سرګردانه
همېشه مي غاښ وتلي وي حلوا کې
عبدالغني وفا
د زړه سره زړه مې بل رقم ته تنګ دی
زندګي راباندې بوج ده، په دنیا کې
مستغفر ګربز
خندا ګانو خوشحالیو سر خوړلی
را نسکور یو د غمونو په بېدیا کې
نسیم منصور
د ښکلا له قافلو یو تر شا پاتې
موږ خواران لکه بې موره په دنیا کې
نور احمد قرآن مل
ما دې دواړه اننګي ګڼلي خپل وو
اوس چې ناست یم خندا راشي په ژړا کې
نقیب احمد عزیزي
هم مسیر به یو شاید د عشق پۀ لاره
زۀ چې خپله رضا وینم ستا رضا کې
نظم الدین ندرت
بې لتا نو دغه ژوند کله تيريږي.
لاس دي راکړه، لاس مې واخله په خندا کې.
وفیق اشنا
بې تا ژوند ناممکن نه بلکې نیستي دی
را شریک مې یې په هر رګ هره سا کې
عزیزالرحمن ایاس
د شهرت طمعه چې ونه کړې دنیا کې!
مشکلات مدام ډېرېږي ارتفا کې!
سیحان کندهاری
په نفاق کې ژوند بې خونده بې مزې وي
راځئ! ووسو د يو او بل په خوا کې
شهزاده شيرين زوی
ما له ډېره نزاکته ځان ګونګی کړ
هک حېران یم د تضادو په دنیا کې
محمدالله تبسم
زه د وخت په ناقدرۍ کې داسي ورک یم
لکه پروت چې وي یوسف د کنعان څا کې
حنیف مظهري
ځان مو هېر دی، ورځ او شپه مو یوه کړې
دومره بوخت یو، د هېواد په ارتقاء کې!
مهاجر فراهي
دیموکراته نړۍ هسې ترې په تنګ ده
کنه هېڅ نقصان والله که شته ملا کې!
م سید سبحاني اغا
ماتوم کوپړۍ د هر یاغي زورواکي
راسره چې وي دا څو یاران په خوا کې
عمران همزولی
زړۀ دې نۀ دی چې نن نوي وعده راکړې
کال خو تېر شو په سبا, سبا, سبا کې
زاهد زېری
تاته خاندم خو د زړه حالت مې بل دی
را حصار یم د غمونو په کلا کې
طالب کریمي
ما دې رنګ په رنګینیو کې ونه موند
په ګلاب کې، په غاټول کې، په بورا کې
اسرار عواد
لکه زړه د لمر د نور له زاته جوړ يې
څوک به څنګه کوي شک ستا په ښکلا کې
روح الامین روحاني
د نرګسو خوشبويي مې حسه وله
بيا دې زلفې خوشې کړي پۀ هوا کې
طاهر اترنګ
اوس مې هم له کېفه زړه بې واره سوځي
خدا زده څه اور دې ګډ کړی و خندا کې
صدیق مومند
بیخې زړهٔ د خوشحالۍ ټوپونه وکړل
څه اثر دې? ستا د سترګو په ادا کې
انعام نعیمي
دکوثر هومره مې مينه پرې ماتېږي
دومره خوند دی ستا د مينې په سُقيا کې
حماد ماليار
زړۀ مِ ستا پۀ شینکو سترګو کِ غرق خوښ دی
لکه کب چې وي خوشحاله پۀ دريا کې.
احسان ژمن
پۀ سکون مې اضطراب د زړۀ بدل کړي
عجب کیف دی ستا د سترګو پۀ مسکا کې
منصور درمان
ته زمونږه د خوږې میني امام یې
عجیب خوند ده، تا پسې په اقتدا کې
یعقوب شجاع
دې قاري خو داسې ځای تلاؤت بس کړ
چې یوسف یې بېرته پرېښودۀ پۀ څا کې
رحیم سکندر
د ښکلا نغمې به ورور – ورو ترې ټوکیږي
ستا خبرې یې شیندلي دي دنیا کې
جهادي عمري
د تيارو د ټولېدو پېغام به راوړي
شته وارث د پېغبر غار حرا کې
عرفان الله ایوبي
د القدس پر غیرتي زلمو ناورین دی
د خوني جګړې اوربل دی په اقصی کې.
ق یوسف احمدي
د غزې شهید معصوم ګلاب ته غوږ شئ
یو عالَم ګیلې یې وکړې په چوپتیا کې
راشد کامران
چې له مرګه له اجله خلاصی نشته
کاش چې مړ وای په غزه کې په غزا کې
شرر ساپی
يه اقصي چې له دوښمن دي ګټی نه شم
راته عار دی چې دې نوم اخلم دعا کې!
سید امين امين
ایوبي، یا ستر زنګي را ویښومه!
که پیدا نشو بل نر ټوله دنیا کې
راشد جالب
اې په وینو کې لت پت مظلومه واوره
خپل قامت درته بښمه په بها کې
حامد ناصر
مسلمان امت ويدۀ دی پۀ غفلت کې
د يهودو غوبل جوړ دی پۀ اقصی کې
عبدالباسط وصاف
عربي شيخان لا مست دي ميکدو کې
د غزې مسلمان سوځي په ټکا کې
عبدالرحيم غياث
ربه ته د اسکېرليو مدګار شې
ربه ته يې اسره وکړې په دنيا کې
نورالحبيب نثار
څوک به څه زما د حال پوښتنه وکا
لکه ګل يم ټوکېدلی په بيديا کې
هنر احمدزی
د غوښتنې له ذلته دې خدای ساته!
ژوندون خوند کړي په اعزاز د استغناکې
روحاني
مونږ يې غواړو خو کوښښ ورپسې نکړو
خلکو جوړ کړل جنتونه په دنيا کې
شهزاده شيرين زوی
پای.
