کابل ټکی کام (سه شنبه، ۱۵ غبرګولی، ۱۴۰۳ل)
د اسرائیلو په شمالي سیمو کې د لبنان د حزب الله مقاومتي غورځنګ له هوايي بریدونو وروسته پراخه اور لګېدنه رامنځته شوې، چې د ۲۴ ساعتو په تېریدو لا هم دوام لري. او د اور وژنې ټیمونه لا هم د اور په کنترولو نه دي بریالي شوي او اوس دغه اور له ځنګلي سیمو د اسرائیلي ښارونو پر لوري د پراخېدو په حال کې ده او ګڼ کورونه پکې سوځیدلي دي.د ټایمز اف اسرایل د راپور له مخې له دغو اورونو وروسته د اسراییلو پخواني لومړي وزیر “نفتالي بینیټ” د بنیامین نتانیاهو پر حکومت توندې نیوکې کړې نوموړي ویلي یې دي چې نتنیاهو د مشرتابه وړتیا نلري او باید له دندې په خپله خوښه استعفاء وکړي کنه په زور باید له دندې لرې شي.د صهیونیستي ريژیم پخواني لومړي وزیر ویلي: “موږ باید شمالي سیمې وژغورو، شمالي سیمو کې اورلګېدنې ښکلي ځایونه ویجاړ کړي او زرګونه کسان اړ شوي، چې له خپلو سیمو وتښتي موږ دا مهال ستر ناورین سره مخ یو.د یادونې وړ ده، چې د لبنان حزب الله غورځنګ وروسته له هغه د لبنان-اسرائیلو پر پوله یهودي میشتي ښارونه په نښه کړل، چې صهیونیستي ريژیم د لبنان په جنوب کې پر یو شمېر کلیو هوایي بریدونه وکړل او ګڼو کسانو ته یې مرګ ژوبله واړوله.
