حماس: صهیونیستي ريژیم یوازې د خپلو بندیانو د خوشې کولو په لټه کې ده؛ خو موږ د شخړې اساسي حل غواړو

کابل ټکی کام (جمعه، ۱ چنګاښ، ۱۴۰۳ل)
د حماس اسلامي غورځنګ یو لوړ پوړي غړي ویلي، چې صهیونیستي ريژیم یوازې د خپلو بندیانو د خوشې کولو په لټه کې ده؛ خو دوی د روانې شخړې اساسي حل غواړي. دښمن د فلسطيني ولس ته له هيڅ ډول پيسو پرته خپل بنديان غواړي.
“محمود مرداوي”چې د حماس غورځنګ له مهمو مشرانو څخه ګڼل کېږي الجزیرې نړیوال تلویزیون سره په خبرو کې ویلي، چې غورځنګ یې تر اوسه د بندیانو د تبادلې په اړه له صهیونیست رژیم څخه څرګند ځواب نه دی اوریدلی.
مرداوي زیاته کړه: امریکايي لوری د اشغالګر رژیم په استازیتوب د بندیانو د تبادلې د تړون په اړه خبرې کوي، چې دا یو منافقانه سیاست دی او دوی ته د منلو وړ نه دی.د یادونې وړ ده، چې فلسطیني مقاومت ډلو د تېر ۲۰۲۳م کال د اکتوبر په ۷مه نېټه له غزې څخه د اسرائیلي رژیم پر وړاندې د «الاقصی طوفان» په نامه څپونکي عملیات پیل کړل، چې په غچ کې یې اسرائیلو پر غزې پراخ هوایي او ځمکني عملیات پیل کړل؛ خو د اتو میاشتو له جګړې وروسته هم صهیونیستي ريژیم خپلو موخو ته و نه رسېده، نه یې خپل بندیان خوشې کړل او نه یې د فلسطیني ولس مقاومت مات کړ، بلکې د درنو زیانونو له ګاللو وروسته د غزې له جنوبي سیمو شاتګ ته اړ کړل شول او اوس هڅه کوي د خپلې ماتې د جبران لپاره د خبرو اترو پر مېز یو څه تر لاسه کړي. د کتونکو په باور لکه څنګه چې په نظامي ډګر کې فلسطیني ډلې پیاوړې ښکاري دغه راز خبرو اترو کې هم غښتلی دي.