کابل ټکی کام (پنجشنبه، ۲۲ لیندۍ، ۱۴۰۳ل)
د نړیوالو رسنیو د راپورونو له مخې صهیونیستي ريژیم تېرو ۷۲ ساعتونو کې د سوریې په بېلا بېلو سیمو ۵۰۰ هوایي بریدونه کړي دي.
نړیوالو رسنیو د سوریې د بشري حقونو د څار د لندن میشتي سازمان په حواله راپور ورکړی، چې اسرائیلو یوازې په پلازمېنه دمشق ۳۰۰ هوایي بریدونه کړي او پاتې ۲۰۰ بریدونه یې په ادلب، حلب، حماه او حمص ولایتونو کې ترسره کړي دي.
د یاد سازمان په خبره یادو بریدونو کې د اسرائیلو نږدې ۳۰۰ ډول، ډول جنګي الوتکو برخه اخیستې او د سوریې د پرځیدلي ريژیم د وسله والو ځواکونو څخه پاتې مهم پوځي تجهیزات لکه جیټ الوتکې، چورلکې، د وسلو جوړولو کارخونې ډول، ډول ټانکونه او تر ۵۵ جنګي بېړۍ او ګڼ پوځي هوایي ډګرونه یې ویجاړ کړي دي.
د تحریرالشام په مشرۍ د سوریې منځ مهالي حکومت، چې دا مهال په پلازمېنه دمشق او ځینو نورو سیمو ولکه لري د اشغالګر صهیونیستي ريژیم وروستي وحشیانه بریدونه غندلي او دایې د سوریې په کورنیو چارو کې بربنډه مداخله بللې ده.
له بل پلوه، ایران، قطر، روسیې، افغانستان، یمن، لبنان او د فلسطین حماس مقاومتي غورځنګ هم یاد بریدونه غندلي دي.
د ویلو ده، چې صهیونیستي ريژیم هم په رسمي توګه سوریه کې د عملیاتو پخلی کړی او ادعا یې کړې، چې د سوریې جنوبي سیمو ته یې ځمکني ځواکونه هم ننوتلي دي.
