کابل ټکی کام (جمعه، ۳ حوت، ۱۴۰۳ل)
افغان ملي سوداګر او د عزیزي ګروپ مشر میرویس عزیزي افغانستان ته د خپل سفر په ترڅ کې د ۵۰۰ میلیونه ډالرو په ارزښت د یوه طبي کمپلکس د جوړولو چارې پيل او د ۱۰ میلیارده ډالرو پانګونې یو پینځه کلن پلان اعلان کړ.
په دې اړه په جوړه شوې غونډه کې چې پکې د رياست الوزرا اقتصادي مرستيال ملا عبدالغني غني برادر او نورو لوړپوړو چارواکو ګډون کړی و، ښاغلي عزیزي وويل، چې د خیریه مرستو په برخه کې، عزیزی بنسټ په کابل کې یو لوی طبي ښارګوټی جوړوي، چې لاندې برخې به ولري:
•د سرطان د درملنی یو ۴۰۰ بستریز مجهز روغتون
•یو ۲۰۰ بستریز مجهز زیږنتون
•یوه یتیم خانه چې د ۱۰،۰۰۰ ماشومانو د ساتنې ظرفیت ولري، چې استوګنځي، ښوونځی او روغتیايي مرکز پکې شامل دي
•طبي پوهنتون
•د نرسنګ (قابله ګي) ښوونځی
•د محصلینو لپاره لیلیه
•د ډاکترانو او استادانو لپاره د استوګنې کمپلیکس
د ښاغلي عزیزي په وينا، د ۵۰۰ میلیونو ډالرو په مجموعي لګښت، دا طبي ښارګوټی به د کابل په اتمې ناحیې کې په ۳۵۰ جریبه ځمکه کې جوړ شي او په خبره يې د ده د مرحومې لور په ویاړ به د “فرشته عزیزي طبي ښارګوټي” په نوم ونومول شي. د یاودنی وړ ده چی د فرشته عزیزی طبي ښارګوټی به یو غیر انتفاعي بنسټ وي او یوازینی هدف به یې وطنوالو ته وړیا پرمختللې طبي، تعلیمي، او تدریسي خدمات وړاندې کول وي، په ځانګړي ډول هغو کسانو ته چې بې وزله دي.
ښاغلي عزيزي، د افغانستان د خلکو سره د پخواني ژمنې پر اساس د ۱۰ میلیاردو ډالرو په ارزښت د پانګه اچونې د یوې ۵ کلنې برنامې اعلان هم وکړ، چې په وينا يې د دې پلان لومړنۍ پروژه د کابل ښار لپاره د ۲۰۰ میګاواټه لمریزې برېښنا د تولید پلان د پیل خبر ورکړ چې په خبره يې په ۸ میاشتو کې به دغه پروژه بشپړه شي.
هغه وويل، غواړي په پنځه کلنه پانګيزه برنامه کې په ټول هېواد کې لسګونه دغه ډول د برېښنا د تولید مرکزونه جوړ کړي چې په ټوله کې ۱۰،۰۰۰ ميګاواټه برېښنا ته ورسېږي.
