د پاکستان او هندوستان جګړه؛ اسلام آباد وسله والو ځواکونو ته د ځوابي برید بشپړ واک ورکړ

کابل ټکی کام (چهارشنبه، ۱۷ غویی، ۱۴۰۴ل)
د لومړي وزیر شهباز شريف په مشرۍ د ملي امنیت شورا غونډه کړې، چې پکې د هندوستان د وروستۍ تېري پر وړاندې د پاکستان ځوابي ستراتيژۍ ته د کتنې ترڅنګ پوځ ته په هندوستان د برید پوره واک ورکړل شوی ده.
د غونډې مشري وزیراعظم شهباز شريف کوله، او پکې د پاکستان بحري ځواکونو مشر نويد اشرف، د وسله والو ځواکونو مشر جنرال عاصم منیر د عدلیې وزير اعظم نذير تارړ،احسن اقبال، او مصدق ملک ګډون کړی و.
غونډه شاوخوا دوه ساعته روانه وه، چې پکې پوځي چارواکو د هند د بریدونو او د پاکستان د ځوابي برید په اړه وضاحت ورکړ. پوځي مشرانو ویلي، چې پاکستان د هند برید ته ځواب ورکړی او د هند پنځه جنګي الوتکې يې غورځولې، همداراز یې د هند تر ولکې لاندې کشمیر کې د هندي پوځ مرکزي قرارګاه له منځه وړې ده.
لومړي وزیر ویلي، چې ټول قوم د وسله‌والو ځواکونو تر شا ولاړ ده او حکومت د پاکستان پوځ ته د هر ډول اړين اقدام لپاره بشپړ واک ورکړی دی.