کابل ټکی کام (چهارشنبه، ۱۷ غویی، ۱۴۰۴ل)
د حماس اسلامي غورځنګ پوځي څانګې “القسام” لېوا دیوې اعلامیې په خپرولو سره ویلي، چې ځواکونو یې د غزې تړانګې په رفح سیمه کې د صهیونیستي یرغلګرو پر ضد تازه عملیات ترسره کړي دي.
د القسام په وینا: ځواکونو یې د رفح ښار “المشروع” څلور لارې ته نږدې، هغه کور په نښه کړی، چې صهیونیستي ځواکونه پکې ځای پر ځای شوي وو. القسام لېوا ادعا کړې، چې یاد کور یې په “TBG” توغندیو ویشتلی، چې له امله یې دښمن ته درانه تلفات اوښتي دي.
د القسام اعلامیه زیاتوي: کله چې د لومړي برید ټپیان او پاتې عسکر ژوندی پاتې شول ځواکونو یې د صفري فاصلې څخه یاد کور ته ننوتل او پاتې پوځیان یې له منځه یووړل.
دا عملیات د القسام لخوا د “أبواب الجحيم” (دوزخ دروازې) تر نامه لاندې د روانې جګړې یوه برخه بلل شوې ده.
د یادونې وړ ده چې له څو ورځو راهیسې د رفح ښار په بېلابېلو سیمو کې صهیونیستي ترهګر ريژیم وحشیانه بریدونو زور؛ خو پر وړاندې یې د فلسطیني مقاومت ځوابي بریدونو کې هم زیاتوالی راغلی دی.
