کابل ټکی کام (جمعه، ۱۹ غویی، ۱۴۰۴ل)
د بامیان ولایت د مرکز اړوند د ککرک بالا په کلي کې یو زراعتي کانال او یو سربند، د ۲ میلیونه او ۴۸۵ زره افغانیو په مالي لګښت جوړ او ګټې اخیستنې ته وسپارل شول.
د بامیان د والي ویاند، صبور فرزان سغاني وايي چې یاد کانال ۱۰۳ متره او سربند ۱۷ متره اوږدوالی لري، چې د ملګرو ملتونو د پراختیایي پروګرام (UNDP) له خوا تمویل شوي او د افغانستان د راتلونکو نسلونو مؤسسې له لوري تطبیق شوي دي.
نوموړي زیاته کړه، چې د دې پروژې له پلي کېدو سره به د سیمې کروندګرو ته د اوبو لګولو په برخه کې د پام وړ اسانتیاوې برابرې شي، او د کرنیزو محصولاتو په تولید کې به مثبت بدلون راشي.
یادې پروژې موخه د اوبو د سرچینو ښه مدیریت، د زراعت پراختیا، او د کلیوالو د معیشت ملاتړ ښوول شوی دی.
