کابل ټکی کام (جمعه، ۲۳ غبرګولی، ۱۴۰۴):
د حماس اسلامي غورځنګ د پوځي څانګې “القسام” لېوا ویاند ابو عبیده ویلي، چې دوی د ایران اسلامي جمهوریت سره د صهیونیستي رژیم پر ضد روان یرغل کې بشپړ ملاتړ اعلانوي.
نوموړي په یوه خپره کړې اعلامیه کې ویلي، چې د صهیونیستي رژیم وروستي بزدلانه بریدونه د دې لپاره ترسره شوي، څو ایران ته له فلسطیني ولس سره د ملاتړ سزا ورکړل شي. هغه زیاته کړې: “ایران د فلسطین د مظلوم ولس تر څنګ ولاړ دی او د هغوی د باعزته مقاومت پراخ ملاتړ یې کړی دی.”
ابو عبیده د برید له امله د ایران له مشرانو او د شهیدو شویو پوځي جنرلانو له کورنیو سره خواخوږي څرګنده کړې او ویلې یې دي، چې دښمن ډېر غلط فکر کوي که داسې انګېري، چې دا ډول بریدونه به د مقاومت جبهې کمزورې کړي، یا به د صهیونیستي رژیم بنسټونه ټينګ کړي نو ستره تېروتنه کوي.
نوموړي ټينګار کړی، چې دا بریدونه د صهیونیستي رژیم ستراتیژیکې تېروتنې دي، او د الله تعالی په اراده به د هغوی د حتمي زوال لامل وګرځي.
