مدثر همراز
جاپان، هغه هېواد چې د هستوي وسلو قرباني شو، نن د نړۍ له مخترع او پرمختللو ملتونو څخه شمېرل کېږي. خو د هستوي وسلو اوسني مالکان بیا شمالي کوریا ته لاس نه شي غځولی. روسیه، چې د خپل وخت ستر ځواک بلل کېده، دولس کاله یې افغانستان اشغال کړ، خو پایله یې له شرمندګۍ او ناکامۍ پرته بله نه وه. شل کاله د B-2 بمالوتکو خاوندانو، د عصري ټېکنالوژۍ واکدارانو، افغانستان کې خپل ټول ځواک د ټولې نړۍ په ملتیا وکاراوه، خو یو مؤمن ولس یې مات کړ.
د زمانې فرعون، ټرمـ. ـپ، چې پر خپلو اټـ. ـومي وسلو نازېده، د ایـ. ـ.ران پر وړاندې هر ډول ګواښ وکړ، خو نن یې حتی د جامې پټۍ نه ټینګېږي لاره ترې ورکه ده.
دا ټول تاریخ موږ ته دا پیغام راکوي چې دا نړۍ د الله جل جلاله په ولکه کې ده. هو، موږ ته د “وَأَعِدُّوا لَهُم مَّا اسْتَطَعْتُم مِّن قُوَّةٍ” حکم شوی، او باید تر خپلې وسې او توان چمتووالی ونیسو؛ خو دا چمتووالی به تر خپل استطاعت وي، نه دا چې د مادیاتو په نوم خپل ایمانونه خرڅ کړو.
د الله مرسته هغه مهال ښکاره کېږي، کله چې مسلمان د مادي وسایلو له پلوه کمزوری وي، خو په معنویت کې غښتلی وي، او بریا ترلاسه کړي. که یو څوک له دښمن سره له مادي پلوه برابر یا تر هغه پیاوړی وي، بیا د معنوي مرستې کمال نه څرګندېږي.
مسلمان باید تل د الله تعالی د نصرت منتظر وي، او په خپلو معنوي ارزښتونو اتکا وکړي، څو نړۍ ته د اسلام حقانیت ښکاره شي. د اسلام تاریخ هم دا ثابتوي؛ د بدر، احد، او نورو غزواتو مثالونه دا ښيي چې مسلمانان به اکثره مهال له مادي پلوه کم وو، خو معنوي ځواک به یې بریا ور په برخه کړه.همدا ډول الله تعالی په خپل سپېڅلي کتاب کې هم مسلمان ته فرمایلي چې یو مسلمان به د څو کافرانو مقابله کوي، ځکه ایمان، یقین، او توکل هغه وسایل دي چې له هر ډول وسلې پیاوړي دي.
نو مسلمان باید هېڅکله د چمتووالي، مصلحت، یا نورو پلمو په نوم له خپل حیا، عزت، ناموس او ارزښتونو تېر نه شي. خپل ایمان دې هېڅکله د دنیا له متاع سره بدل نه کړي، او له مادیاتو دې متأثر نه شي.
د اسلام عظمت په معنویت کې نغښتی دی، او دا معنویت باید د هر مسلمان د ژوند محور وي.
