(کابل ټکی کام، شنبه، ۱۴ چنګاښ ۱۴۰۴):
د حماس پوځي څانګې القسام، اعلان کړی چې جنګیالیو یې پرون جمعه سهار د خانيونس په منځ کې د اسرائيلي ځواکونو پر يوې ډلې ځانګړې حمله کړې او دوه د «ميرکفاه» ډوله ټانکونه یې د «شواظ» بمونو په مرسته په نښه او ويجاړ کړي، چې په ترڅ کې د ټانکونو ټولې عملې ته مرګ ژوبله اوښتې ده.
دغه راز القسام وايي، د برید پر مهال د پوځيانو يو نقلوونکی موټر هم د «الياسين ۱۰۵» توغندي سره هدف ګرځول شوی او د ژغورنې پر راغلي ځواک هم سپکو او درنو وسلو ډزې شوې دي چې په وينا يې د اسرائيلي پوځ هلیکوپټرو د بريد له ځايه څو ساعته د مړو او ټپيانو د ایستلو عملیات ترسره کړل.
اسرائيلي پوځ منلې چې په دې برید کې يو عسکر وژل شوی، څلور نور ټپیان شوي او د دوو حالت نازک دی.
له ځمکنیو عملیاتو د پيل راهیسې د اسرائيلي پوځ د تلفاتو شمېر ۴۴۱ ته رسېدلی، او د ټولې جګړې له پيل راهیسې ۸۸۳ عسکر او افسران وژل شوي دي، خو ازادې سرچينې وايي په غزه کې د اسرائيلي ځواکونو تلفات تر دې څو چنده زيات دي.
