کابل ټکی کام (دوشنبه، ۱۰ لیندۍ، ۱۳۹۹ل)
د راپورونو له مخې په قطر کې د طالبانو د سیاسي دفتراستازو قطر کې د ايران له سفير “حمید رضا دهقاني” سره په دوه اړخيزو اړيکو خبرې کړي.
په قطر کې د طالبانو د سیاسي دفتر ویاند ډاکټر محمد نعیم په خپله ټویټر پاڼه لیکلي، چې نن د طالبانو د سیاسي دفتر له ایران، ترکیې او منځنۍ اسیا هېوادونو سره د اړیکو د برخې مسؤل قاري دین محمد حنیف او ورسره مل هئیت په قطر کې د ایران هېواد سفیر حمید رضا دهقانی او ورسره مل پلاوي سره کتلي دي.
نوموړي زیاته کړې چې په دې لیدنه کې د دواړو هېوادونو اړوندو موضوعاتو، دوه اړخیزو اړیکو او همداراز د بین الافغاني خبرو په اړه خبرې شوي دي.
بايد وويل شي چې په وروستيو کې د طالبانو سیاسي فعاليتونه ډېر شوي او استازي يې د راتلونکي افغانستان په اړه د سيمې او نړۍ د هيوادونو له استازو سره ليدنې کوي، چې د کابل حکومت اندېښنې ورسره زياتې شوي دي.
