کابل ټکی کام (پنجشنبه، ۲۷ وږی، ۱۴۰۴ل)
د اسراییلي رسنیو د راپور له مخې، د صهیونیستي پوځ د ګولاني ځانګړې لېوا لس تنه سرتیري د رفح په یوه پوځي کمپ کې وژل شوي دي.
سرچینې وايي، پېښه نن سهار وختي هغه مهال رامنځته شوه، چې یاد سرتیري د شپې له ستړیا وروسته د ارام پر مهال د مقاومت ځواکونو له لوري په ډزو وویشتل شول.
د صهیونیستي پوځ رادیو د پیښې پخلی کړی او په خبره یې وژل شوي ټول د ګولاني ځانګړې لېوا اړوند سرتېري دي او برید د دوی د خوب پر مهال ترسره شوی دی.
د تېرې یوې اوونۍ په اوږدو کې یوازې د رفح او خان یونس په جګړو کې د صهیونیستي پوځ لسګونه عسکر وژل شوي او ګڼ نور ټپیان دي.
د برید مسؤلیت د حماس اسلامي غورځنګ پوځي ځانګې “القسام” منلی، او په یوه خپره کړې خبر پاڼه کې یې ویلي، چې عملیات یې ځانګړو ځواکونو ترسره کړي دې.
القسام ټینګار کړی، چې تر بشپړې خپلواکۍ پورې به د اشغال پر وړاندې جګړه روانه ساتي او صهیونیستي پوځ ته به درنه مرګ ژوبله اړوي.
