د امريکا ولسمشر ډونالډ ټرمپ وروستۍ څرګندونې چې غواړي د افغانستان د باګرام هوايي اډه بېرته ترلاسه کړي، دا ډول څرګندونې نوې نه دي، بلکې نوموړي تر دې وړاندې هم ورته خبرې کړي وې، خو دا ځل یې بیا تکرار د دې څرګندونه کوي چې ځینې کړۍ لا هم د افغانستان پر خاوره د خپلو پوځي اهدافو د پلي کولو خیالونه لري.
د افغانستان اسلامي امارت د بهرنيو چارو وزارت په خپل وخت غبرګون وښود او ټينګار یې وکړ چې هېڅ بهرنی ځواک ته به د افغانستان په خاوره کې د پوځي حضور اجازه ورنکړي. دا دریځ د افغانانو د تاریخي او ملي غوښتنو څرګندونه کوي. زموږ ملت په تېر تاریخ کې بیا بیا ثابته کړې ده چې د بهرني یرغل او پوځي حضور زغم نه لري. د انګریزانو ماتې، د شوروي اتحاد له منځه تګ او د امریکا د شل کلن حضور پای ته رسېدل د دې روښانه بېلګې دي.
افغانستان نن د یو خپلواک هېواد په توګه هڅه کوي له نړۍ سره د دیپلوماتیکو او اقتصادي اړیکو له لارې ګډ کار وکړي. نړیوال هم باید په دې پوه شي چې زموږ هېواد د جګړې له اوږدې تجربې وروسته یوازې سولې، ثبات او پرمختګ ته اړتیا لري، نه د بهرنیو اډو او پوځي مداخلې ته. د هر ډول پوځي شتون هڅه به یوازې د افغانانو احساسات راوپاروي او د سیمې ثبات ته به ستر ګواښ شي.
ټرمپ او ورته نور سیاستوال باید د افغانستان په اړه خپل فکرونه د تېرو ناکامیو پر اساس اصلاح کړي. دلته هېڅوک د بهرني حضور هرکلی نه کوي. که امریکا او لوېدیځ غواړي له افغانستان سره اړیکې ولري، باید د متقابل احترام او اقتصادي همکارۍ پر بنسټ یې جوړې کړي، نه د پوځي اډو او اشغالګرانه پلانونو پر اساس.
افغانان د خپل استقلال په ساتنه کې متحد دي او هیڅکله به اجازه ورنکړي چې د باګرام یا بل هر ځای د بهرنیانو د پوځي اډې په توګه وکارول شي. د وخت غوښتنه دا ده چې نړیوال د افغانستان د نوې واقعیت منلو ته غاړه کېږدي او زموږ د ملت خپلواک دریځ ته درناوی وکړي.
