کابل ټکی کام (چهارشنبه، ۱۶ تله، ۱۴۰۴ل)
د روسیې د بهرنیو چارو وزیر سرګي لاوروف د مسکو فارمټ اوومه مشورتي ناسته کې له لوېدیځو هېوادونو غوښتي چې د افغانستان کنګل شوې شتمنۍ ازادې کړي او د دغه هېواد د بیارغونې مسوولیت پر غاړه واخلي. دا ناسته پرون په مسکو کې د سیمې د هېوادونو د استازو په ګډون ترسره شوه.
لاوروف د اسلامي امارت هڅې د نشهيي توکو د مخنیوي او امنیت د ټینګښت په برخه کې ستایلې، ویې ویل چې امارت د محدودو سرچینو او بندیزونو سره سره د داعش په ګډون ترهګرې ډلې سختې ځپلې دي.
هغه زیاته کړه، د ۲۰۲۲ کال راهیسې په افغانستان کې د کوکنارو د کر او تولید کچه نږدې ۹۰ سلنه راټیټه شوې، چې دا یو مهم پرمختګ دی.
دغه راز نوموړي په افغانستان او ګاونډیو کې د بهرنیو پوځي اډو جوړول خطرناک بللي او خبرداری یې ورکړی چې دا کار به ناوړه پایلې ولري.
لاوروف ټینګار وکړ چې روسیه له کابل سره د همکارۍ دوام ته ژمنه ده او د سیمهییزو میکانیزمونو له لارې به اړیکې لا پیاوړې کړي.
