کابل ټکی کام (شنبه، ۳ لړم، ۱۴۰۴ل)
د ترکیې په لویدیځ «موغله» ولایت کې د کډوالو یوه کښتۍ ډوبه شوې چې لږ تر لږه ۱۴ کسان پکې مړه شوي دي.
ترکي چارواکو ویلي، یو افغان له دې پېښې ژوندی پاتې شوی او ویلي یې دي چې په کښتۍ کې ۱۸ کسان سپاره وو، چې څو دقیقې وروسته ډوبه شوه. د ژغورل شوي افغان هویت لا نهدی څرګند شوی.
ځايي چارواکي وايي، د یوې چورلکې او کښتۍ په مرسته د ژغورنې او لټون عملیات روان دي.
د چارواکو په وینا، د پېښې سیمه د سمندر د سختو وضعیتونو له امله د ژغورنې لپاره ننګونې لري، او هڅې روانې دي چې پاتې کسان وژغورل شي او د مړو شمېر دقیق شي.
