کابل ټکی کام (شنبه، ۱۱ سلواغه، ۱۴۰۴ ل)
د افغانستان د اسلامي امارت ویاند، ذبیحالله مجاهد، ویلي چې د دوی حکومت ته تر اوسه پورې نه یوه افغانۍ او نه هم یو امریکایي ډالر په مستقیم ډول له بهرنیو هېوادونو مرسته شوې ده.
نوموړي دا څرګندونې د هغو راپورونو په غبرګون کې کړي، چې په وروستیو کې په ځینو رسنیو کې خپرې شوې وې او پکې ادعا شوې وه، چې اسلامي امارت ته بهرنۍ مالي مرستې رسېږي. مجاهد دا ډول ادعاوې د پخوانیو استخباراتي کړیو او د بهرنیو ځواکونو له لوري د روزل شوو ډلو تبلیغات وبلل او ویې ویل، چې موخه یې د اسلامي نظام بدنامول دي.
هغه زیاته کړه، چې د افغانستان اسلامي امارت په رسمي پالیسۍ کې له بهرنیو هېوادونو د مرستو غوښتنه نشته. د هغه په وینا، د طبیعي پېښو، په ځانګړي ډول د زلزلې پر مهال هم د مشرتابه له لوري هغه اعلامیه ونه منل شوه، چې پکې له نړیوالې ټولنې د مرستو غوښتنه شوې وه، بلکې ټینګار شوی و، چې مرستې باید له خپله افغانانو راټولې شي، څو هېواد د نورو تر احسان لاندې پاتې نه شي.
د اسلامي امارت ویاند همداراز څرګنده کړه، چې د ۴۰ میلیوني کڅوړو په نوم یادې شوې پیسې هغه بشري مرستې وې، چې دوه یا درې کاله وړاندې د بهرنیو موسسو او بنسټونو له لوري د بشري چارو لپاره لګول کېدې. د هغه په وینا، دغه مرستې د اسلامي امارت بودیجې ته نه داخلېدې او بشپړ کنټرول یې د مرستندویه ادارو په واک کې و.
مجاهد ټینګار وکړ، چې د دوی حکومت هڅه کوي افغانستان یو باثباته، خپلواک او پر ځان بسیا هېواد وګرځوي، او ټولو هېوادونو ته یې بلنه ورکړه، چې له افغانستان سره ښې سیاسي او اقتصادي اړیکې ټینګې کړي او په دغه هېواد کې پانګونه وکړي.
دا څرګندونې په داسې حال کې مطرح کېږي، چې په وروستیو کې ځینو رسنیو راپور ورکړی و، چې ګواکې د امريکا د سنا مجلس له لوري اسلامي امارت ته د مرستو د رسېدو د مخنیوي طرحه تصویب شوې ده.
