کابل ټکی کام (شنبه، ۲۳ کب، ۱۴۰۴ل)
د اسلامي همکاریو سازمان، عرب لیګ او افریقايي ټولنې په یوې ګډې اعلامیې کې د صهیونیستي چارواکو له لوري د الاقصی جومات تړل او پر لمونځ کوونکو د محدودیتونو لګول په کلکو ټکو غندلي دي.
دغو درېیو نړيوالو سازمانونو ویلي، چې دا اقدام د مذهبي ازادۍ ښکاره سرغړونه ده او کولی شي په سیمه کې د تاوتریخوالي کچه لوړه کړي او نړیواله سوله له جدي ګواښ سره مخ کړي.
په اعلامیه کې پر نړیوالې ټولنې، په ځانګړي ډول د ملګرو ملتونو پر امنیت شورا غږ شوی،چې پر اسراییلو فشار راوړي، څو د الاقصی جومات دروازې ژر تر ژره د عبادت کوونکو پر مخ پرانیزي او د القدس تاریخي او قانوني وضعیت ته درناوی وکړي.
اعلامیه زیاتوي چې د الاقصی جومات ټول ۱۴۴ جریبه حریم یوازې د مسلمانانو د عبادت ځای دی او هېڅوک د دې سپېڅلي ځای په چارو کې د لاسوهنې حق نه لري.
دا غبرګون داسې مهال څرګند شوی چې په وروستیو ورځو کې اسراییلي ځواکونو په القدس او شاوخوا سیمو کې امنیتي تدابیر سخت کړي، چې له امله یې د روژې په مبارکه میاشت کې زرګونه فلسطینیان په الاقصی جومات کې له عبادت کولو محروم شوي دي.
