روسیه: د یورانیمو غني کول د ایران مشروع حق دی
کابل ټکی کام (چهارشنبه، ۲۶ وری، ۱۴۰۵ل)
د روسیې د بهرنیو چارو وزیر سرګي لاوروف ویلي، چې د ایران لپاره د یورانیمو غني کول یو مشروع حق دی او مسکو د هر هغه حل ملاتړ کوي، چې د ایران قانوني حقونه پکې خوندي وي.
لاوروف لوېدیځ تورن کړی، چې پر نورو هېوادونو د خپلو سیاستونو د تپلو هڅه کوي او دا چلند د نړیوالو کړکېچونو د لا زیاتېدو سبب ګرځي.
د روسي دغه لوړپوړي ډیپلومات زیاته کړې، چې د لوېدیځې اسیا روان کړکېچ ډېر پېچلی دی او ژر حل کېدل یې ستونزمن ښکاري.
هغه ټینګار کړی، چې د سیمې د ستونزو د حل یوازینۍ لار خبرې اترې او متقابل درناوی دی.
