کابل ټکی کام (شنبه، ۵ غویی، ۱۴۰۵ل)
د پروان ولایت جبلالسراج ولسوالۍ کې د «صفوان» په نوم د سمنټو د تولید یوه ستره فابریکه د جوړېدو په حال کې ده، چې د مسوولینو په وینا د دې پروژې اکتشافي چارې بشپړې شوې دي.
د مسوولینو په خبره، د فابریکې د جوړېدو لپاره د ځمکې د هوارولو شاوخوا ۸۰ سلنه چارې ترسره شوې دي، په دې سيمه کې تر ۴۵۰۰ څخه زياتې د سيمنټو د ډبرو نمونې پيژندل شوي، په دې پروژه کې څلوېښت انجينيران او نږدې دوه سوه کارګران بوخت دي او همداراز، د انرژۍ د برابرولو لپاره پلان دی چې نږدې ۹ زره سولري پایې نصب شي، څو د فابریکې د اړتیا وړ برېښنا یوه برخه تأمین کړي.
یاده پروژه چې شاوخوا ۲۲۵ میلیونه ډالره لګښت لري، د کورني تولید د پیاوړتیا او د سمنټو وارداتو د کمولو په موخه پلي کېږي.
تمه ده چې د دې فابریکې په فعالېدو سره به د هېواد په اقتصادي ودې او د کارموندنې په برخه کې هم مثبت بدلون راشي.
