بلخ کې د اوو ولایتونو ترمنځ د تکواندو اوولسم پړاو سیالۍ پیل شوې
کابل ټکی کام (دوشنبه، ۷ غویی، ۱۴۰۵ل)
د المپیک بدني روزنې او سپورټ عمومي ریاست وايي، د بلخ ولایت په کوربهتوب د تکواندو اوولسم پړاو سیالۍ د ۷۰ ورزشکارانو په ګډون پیل شوې.
د یاد ریاست په وینا، دغه سیالۍ د افغانستان لپاره د المپیک لومړۍ مډال ګټونکي روح الله نیکپا د ویاړ په مناسبت جوړې شوې دي چې دغه سیالۍ د مبارزې او پومسې په دوو برخو کې ترسره کېږي.
په دې سياليو کې، د بلخ ترڅنګ د تخار، جوزجان، لغمان، سمنګان، لوګر او پکتیا ولایتونو ورزشکاران هم پکې ګډون لري.
مسوولین وایي، د دغو سیالیو موخه د تکواندو ودې، د لوبغاړو هڅونه او د غوره استعدادونو پېژندنه ده.
