کابل ټکی کام (دوشنبه، ۷ غویی، ۱۴۰۵ل)
د افتاب شرق په نوم د چینايي شرکت مشر لي جیون د بغلان له والي مولوي عبدالرحمن حقاني سره په کتنه کې د دغه ولایت د وسپنې په کانونو د پانګونې او د فولادو تولیدي فابریکې د جوړولو په اړه خبرې کړې دي. د بغلان ولایت مقام وایي، یاد شرکت چمتو دی چې په ۳۰ هکټاره ځمکه د عصري فولادو فابریکه جوړه کړي.
د خبرپاڼې له مخې، لي جیون ویلي دغه فابریکه به د «افغانستان عصري جامع فولاد» تر نوم لاندې د درېیو کلونو په موده کې په درې پړاوونو کې بشپړه شي. نوموړي زیاته کړې، د پروژې په بشپړېدو سره به له درې زرو تر پنځه زرو کسانو ته د کار مستقیم فرصتونه برابر شي.
د بغلان والي هم د چینايي شرکت مسوولینو ته ډاډ ورکړی چې اسلامي امارت به د نافذه قوانینو او اصولو له مخې د وسپنې د استخراج او د فابریکې د جوړېدو لپاره لازمې اسانتیاوې برابرې کړي. ویل کېږي، په بغلان کې د وسپنې شاوخوا ۱۵ میلیونه ټنه زیرمې موجودې دي.
