د کونړ او نورستان ځينې لویې لارې د غره د ښوېدو له کبله بندې شوي
کابل ټکی کام ۱۴حمل/۱۳۹۵، احمدالله مهاجر
له کونړ او نورستان څخه خبري منابع وايي، چې په دغه ولایتونو کې د غره د ښوېدو له کبله ځینې لویې لارې د ترافیکو پر مخ بندې شوي دي.
د کونړ د فواید عامې آمر انجینر محمد الرحیم رسنیو ته د غره د ښوېدو لامل سخت ورښت ښودلی دی.
نوموړي رسنیو ته وویل:
«تېره شپه چې سخت باران ورېدو، له امله یې د اسمار ولسوالۍ د ډب بروړو سیمه کې غر وښوېدو، چې له مرکز اسعد اباد، ناړۍ او غازي اباد ولسوالیو سربېره د ختیځ نورستان ولایت لویه لاره بنده شوه.)
نوموړي همدا راز وویل، په یاده سیمه کې د ۱۸ کیلو مترو په اندازه کې غر ښوېدلی دی، چې له کبله یې دغه لویه لاره بنده کړې ده.
ده زیاته کړه، چې د وسایلو په مټ به دغه لویه لاره بېرته د ترافیکو پر مخ پرانیزي.
ځايي اوسېدونکو هم رسنیو ته ویلي دي، چې له تېرو دوو ورځو راهیسې د غره د ښوېدو له کبله دغه لویه لاره بنده شوې.
د یادولو ده، چې د روانې میاشتې (حمل) په ۷مه نېټه هم د کونړ ولایت په چپې دره کې د سخت ورښت له کبله له غره یوه تیږه راښوېدلې وه، او پر یوه کور رابرابره شوې وه، چې له کبله یې د دغې کورنۍ ۴ غړي وژل شوي وو.
