کندز کې طالبانو نور پرمختګ کړی

کابل ټکی کام ۳۰حمل/۱۳۹۵، احمدالله مهاجر
طالبانو د جمعې له سهار راهیسې د عمري په نوم په ټول هېواد کې عملیات پيل کړي دي، چې خورا توند او شدید روان دي.
د طالبانو د دغو عملیاتو په لړ کې د یو شمېر ولایتونو ترڅنګ یو هم کندز ولایت دی، چې طالبان ورځ تر بلې پکې پرمختګ کوي.
د طالبانو له لورې کابل ټکي کام ته د کندز په اړه رالېږل شوي خبرونه وایي، چې په کندز کې یې نور پرمختګ کړی دی.
طالبان وايي، چې د کندز قلعه زال ولسوالۍ یې نیولې ده.
په خبر کې راغلي دي، چې نن سهار ۸ بجې د دوی د جنګیالیو له لورې د قلعه زال ولسوالۍ امنیه قومندانۍ او شاوخوا ټولې پوستې د روانې جګړې په ترڅ کې نیول شوي دي.
طالبانو همدا راز ادعا کړې ده، چې ګڼ عسکر، پولیس او اربکیان یې له منځه وړي دي، او نور ټول په تېښته بریالي شوي دي.
طالبانو د ګڼو نظامي مهماتو د نیولو خبر هم ورکړی دی.
د طالبانو له لورې په یوه بل خبر کې راغلي دي، چې د کندز ولایت په مرکزي برخو او ولسوالیو باندې د دوی جنګیالیو درنده جګړه روانه کړې ده.
په خبر کې راغلي دي، چې د کندز مرکز اړوند حضرت سلطان سیمې ته بهرني ځواکونه هم د کورنیو عسکرو مرستې ته راغلي وو، چې د دوی د جنګیالیو تر بریدونو لاندې راغلل، چې په ترڅ کې یې یوولسو امریکایي عسکرو ته مرګ ژوبله واوښته.
دا مهال له کندز څخه تازه خبرونه وایي، چې طالبانو د کندز ښار په ختیځه دروازه کې درنده جګړه روانه کړې ده.
د خبرونو پر اساس چې طالبانو د کندز-تخار لویه لاره په ټولیزه توګه نیولې ده.
خبر زیاتوي، چې افغان عسکرو ته د مرستې لپاره تازه دمې قوه راځي، مګر د طالبانو له لورې له سختې ماتې سره مخ کیږي.
ځایي چارواکو رسنیو ته ویلي دي، چې طالبان شېبه په شېبه د پرمختګ په حال کې دي، او غواړي تر څو کندز ولایت ته سقوط ورکړي.
دغو چارواکو همدا راز وویل، چې طالبانو په ټولو لارو کې داسې جګړه کنټرول کړې ده، چې تازه دمه قوه د مرستې لپاره راروانه وي، مګر په لاره کې د طالبانو له برید سره مخ شي، او بېرته شاتګ ته مجبوره شي.
تېره ورځ ولایتي شورا هم وویل، چې د کندز اویا سلنه برخه د طالبانو په لاس کې ده.
دوی اندېښنه وښودله، که امنیتي وضعه همداشان روانه وي، نو ښایي ډېر ژر به دغه ولایت سقوط وکړي.
د یادولو ده، د طالبانو د عمري عملیاتو د پیل موخه د ولایتونو سقوط ښودل شوی دی، چې دا مهال يې د هېواد ګڼې ولسوالۍ د سقوط له ګواښ سره مخ کړي دي.